مذاکرات لئی مثبت جواب نہ ملیا، ہن احتجاج وکھرا ہوئے گا: بیرسٹر گوہر

اسلام آباد (مانیٹرنگ ڈیسک) چیئرمین پی ٹی آئی بیرسٹر گوہر نے آکھیا اے کہ پارلیمانی پارٹی نے فیصلہ کیتا اے کہ 5 اگست نوں عمران خان دی قیدِ ناحق دے تن سال پورے ہو جان گے، ایس دن نوں اسیں اک وڈے ایونٹ دے طور اُتے مناواں گے۔

میڈیا نال گل بات کردیاں اوہناں نے آکھیا کہ ایس دن لئی پاکستان تحریک انصاف دی پارلیمانی پارٹی ولوں وکھو وکھریاں تجویزاں آئیاں نیں۔ ایس دن پورے ملک وچ ریلیاں کڈھن، احتجاج، جلسے، جلوس، کنونشن تے سیمینار کروان دیاں بہت ساریاں تجویزاں آئیاں نیں۔ تحریک انصاف ایہناں ساریاں تجویزاں تے سفارشاں اُتے ان شاء اللہ اپنی پولیٹیکل پارٹی دی میٹنگ وچ بہت جلد مشاورت کرے گی تے ایہناں ساریاں تجویزاں دی روشنی وچ اگلے لائحہ عمل دا اعلان کرے گی۔

اوہناں دا کہنا سی کہ اسیں ہر عدالت دا بوہا کھڑکایا، پارلیمان وچ آواز چکن دی کوشش کیتی پر ساڈی آواز نوں دبایا گیا۔ اسیں مذاکرات دی کوشش کیتی تاکہ سیاسی مسئلیاں دا سیاسی حل نکل سکے، پر دوجے پاسے توں کوئی مثبت جواب نہیں ملیا۔ ہن ایس واری ان شاء اللہ اسیں رکاں گے نہیں۔ تسیں دیکھو گے کہ ایہہ احتجاج وکھرا ہوئے گا۔