شہدا دے خلاف متنازعہ تقریر، فضل الرحمن دی عدالت طلبی
لاہور (کورٹ رپورٹر، مانیٹرنگ ڈیسک) جے یو آئی (ف) دے سربراہ مولانا فضل الرحمن خلاف شہدا بارے متنازع تقریر کرن تے فوج متعلق گل بات اُتے مقدمہ درج کرن دی درخواست دائر کر دتی گئی اے۔ گوجرانوالہ دے ایڈیشنل سیشن جج فیصل جمیل نے مولانا فضل الرحمن نوں 28 جولائی نوں عدالت طلب کر لیا اے۔
درخواست گزار منظور قادر بھنڈر نے موقف اختیار کیتا کہ مولانا فضل الرحمن نے تقریر وچ شہدا دا مذاق اڈایا تے پاک فوج خلاف ہرزہ سرائی کیتی، جس اُتے قانونی کارروائی کیتی جاوے۔
دوجے پاسے سیشن عدالت لاہور وچ مولانا فضل الرحمن خلاف مقدمہ درج کرن دی درخواست اُتے سماعت ہوئی۔ عدالت نے ڈائریکٹر ایف آئی اے (سائبر کرائم/این سی سی آئی اے) توں 17 اگست تیکر جواب منگ لیا اے۔ ایڈیشنل سیشن جج ملک لطیف دے سامنے درخواست گزار وقار دے وکیل مدثر چودھری تے علی شان مناواں نے دلیلاں دتیاں۔
شہری نے موقف اپنایا کہ میں سوشل میڈیا اُتے مولانا فضل الرحمن دی شہدا خلاف تقریر ویکھی جس نال میرے تے عوام دے جذبات مجروح ہوئے۔ مولانا نے جلسے وچ شہدا خلاف ہرزہ سرائی کیتی تے شہدا دے وارثاں دا دل دکھایا، عدالت مولانا فضل الرحمن خلاف مقدمہ درج کرن دا حکم دیوے۔
