جنگ دا نواں محاذ تیار: یمنی حوثیاں نے باب المندب دے نیڑے میزائل نصب کر دتے، عالمی پدھر تے تیل دی سپلائی نوں وڈا خطرہ، امریکا تے ایران دے حملے جاری، ثالثی توں پچھے نہیں ہٹے: پاکستان

حوثیاں دی سعودی تنصیبات تے ہوائی اڈیاں نوں نشانہ بناؤن دی دھمکی، ایران وچ شہادتاں 30 توں ودھ گئیاں

سیمنان ایئرپورٹ وی نشانہ، بحرین تے کویت اُتے جوابی وار، بھارتی جہازراناں نوں ہرمز نہ جان دی ہدایت، زمینی فوج نہیں گھل رہے: امریکی نائب صدر جے ڈی وینس

اسرائیلی حکومت دے کجھ ارکان نے معاہدے نوں روکن تے امریکی عوام دی رائے بدلن دی کوشش کیتی؛ عرباں نوں واپس اونٹاں دے دور وچ پہنچا دیاں گے: خاتم الانبیاء ہیڈ کوارٹرز

تہران، واشنگٹن (نیوز ایجنسیاں)

جنگ دا نواں محاذ تیار ہو گیا اے، یمنی حوثیاں نے باب المندب دے نیڑے میزائل نصب کر دتے نیں، جس نال عالمی پدھر اُتے تیل دی سپلائی نوں وڈا خطرہ لاحق ہو گیا اے۔ امریکا تے ایران دے حملے جاری نیں، جدکہ پاکستان نے واضح کیتا اے کہ اوہ ثالثی توں پچھے نہیں ہٹیا۔ آبنائے ہرمز دے کنٹرول دے جھیڑے اُتے امریکا تے ایران وچکار حملیاں دا سلسلہ تیز ہو گیا اے۔ کویت تے بحرین دی فوجاں دے مطابق دونوں ملک ایرانی فضائی حملیاں دا نشانہ بنے نیں۔ ایران دا کہنا اے کہ اوہنے کویت دے ‘علی السالم’ فضائی اڈے اُتے ریڈار نظام، فضائی دفاعی نظام تے ایندھن دے ذخیریاں نوں نشانہ بنایا اے، جدکہ بحرین وچ ‘شیخ عیسیٰ ایئر بیس’ اُتے موجود امریکی تنصیبات اُتے وی حملے کیتے گئے نیں۔ کویتی فوج نے ڈرون حملیاں دی اک نویں لہر نوں ناکام بناؤن دا دعویٰ کیتا اے۔

امریکی حملیاں دی دوجی لہر دوران تہران سمیت ایران دے کئی شہراں وچ دھماکیاں دیاں خبراں نیں۔ ایرانی سرکاری میڈیا (ارنا) دے مطابق سیمنان ایئرپورٹ نوں نشانہ بنایا گیا اے۔ ایرانی حکومت دی ترجمان فاطمہ مہاجرانی نے تصدیق کیتی اے کہ انہاں امریکی حملیاں وچ 30 توں ودھ شہری شہید ہو چکے نیں۔ پاکستانی دفترِ خارجہ دے ترجمان طاہر اندرابی نے واضح کیتا اے کہ کشیدگی دے باوجود پاکستان نے ثالثی توں ہتھ پچھے نہیں کیتے۔ اوہناں دا کہنا سی کہ امن ول واپسی ‘اسلام آباد ایم او یو’ دے خاکے دے تحت ہی ممکن اے۔ خطے وچ تجارتی جہازاں اُتے حملیاں وچ دو بھارتی جہازراناں دی ہلاکت توں بعد، انڈیا نے اپنے جہازراناں نوں اگلے حکم تیکر آبنائے ہرمز والے رستیاں اُتے نہ جان دی ہدایت کیتی اے۔ اس توں علاوہ تن باخبر ذراع نے رائٹرز نوں دسیا اے کہ ایران نے یمن دی حوثی تحریک نوں آکھیا اے کہ جے امریکا نے ایرانی بجلی تے توانائی دے انفراسٹرکچر اُتے حملے کیتے، تاں اوہ بحیرہ احمر دے تیل دی سپلائی دے رستے نوں بند کرن لئی تیار رہن۔

اس قدم نال عالمی پدھر اُتے توانائی دی سپلائی نوں اک نواں تے سنگین خطرہ پیش آ گیا اے۔ حوثیاں نے باب المندب دے نیڑے ڈرون تے میزائل نصب کر دتے نیں۔ حوثی تحریک دے نیڑے سمجھے جان والے اک ذریعے نے دسیا کہ گروپ نے بحری جہاز رانی اُتے حملیاں دیاں تیاریاں مکمل کر لیاں نیں۔ اس مقصد لئی یمن دے پہاڑی علاقیاں، جو حدیدہ تے خلیج عدن اُتے نظر آؤندے نیں، تے بحیرہ احمر دے لنگھن والے رستے ‘باب المندب’ دے نیڑے وڈے پیمانے اُتے میزائل تے ڈرون تعینات کر دتے گئے نیں تے ہن صرف کارروائی دے حکم دا انتظار اے۔ اس فیصلے دا آخری کنٹرول یمن وچ موجود ایرانی پاسدارانِ انقلاب دے نمائندیاں دے ہتھ وچ ہووے گا۔ سعودی عرب اپنی تیل دی برآمدات دا تقریباً 70 فیصد حصہ بحیرہ احمر اُتے واقع اپنی بندرگاہ ‘ینبع’ راہیں گھلدا اے، جس دا مطلب اے کہ جے ایہ رستہ وی بند یا متاثر ہویا تاں عالمی منڈی وچ تیل دیاں قیمتاں نوں اگ لگ سکدی اے۔

یمن دے حوثی باغیاں نے جمعرات نوں خبردار کیتا اے کہ جے دونوں دھڑیاں وچکار جاری جھیڑے وچ ہور تیزی آئی، تاں اوہ سعودی عرب دی تیل دی تنصیبات تے ہور اہم انفراسٹرکچر نوں نشانہ بناؤن گے۔ ایہ دھمکی باغیاں دے قبضے ہیٹھ دارالحکومت صنعاء دے ہوائی اڈے اُتے ہون والے حالیہ حملے دے کجھ دناں بعد سامنے آئی اے۔ حوثی تحریک دے سربراہ عبدالملک الحوثی نے اک ٹیلی ویژن خطاب وچ آکھیا:

“جے سعودی عرب ساڈے ملک دے خلاف مکمل جارحیت وچ ملوث ہوندے ہوئے کشیدگی ودھاؤن ول قدم چکدا اے، تاں اوہدی تمام تیل دی تنصیبات تے اہم تھاںواں ساڈے میزائلوں تے ڈرونز دے نشانے اُتے ہون گئیاں۔”

اوہناں نے صنعاء ایئرپورٹ اُتے مستقبل وچ ہون والے کسے بھی حملے دے جواب وچ ریاض دے ہوائی اڈے نوں وی نشانہ بناؤن دی سدھی دھمکی دتی۔ اوہناں دا کہنا سی کہ اصل فارمولا ایہو اے: صنعاء ہوائی اڈے دے بدلے ریاض دا ہوائی اڈا، ہوائی اڈیاں دے بدلے ہوائی اڈے، بندرگاہواں دے بدلے بندرگاہواں، تے ناکہ بندی دے بدلے ناکہ بندی۔

امریکی پالیسی اُتے اسرائیلی اثر و رسوخ دا انکشاف

مقبوضہ بیت المقدس، واشنگٹن (نیوز ایجنسیاں، مانیٹرنگ ڈیسک)

امریکی نائب صدر جے ڈی وینس نے اک وڈا انکشاف کردے ہوئے آکھیا اے کہ اسرائیلی حکومت دے کجھ ارکان نے امریکا تے ایران وچکار جنگ ختم کرن دے معاہدے نوں روکن تے امریکی عوام دی رائے بدلن دی کوشش کیتی سی۔ اک پوڈکاسٹ وچ گل بات کردے ہوئے اوہناں نے آکھیا:

“میں بغیر کسے شک و شبہے دے ایہ جاندا ہاں کہ اسرائیلی حکومت دے اندر کجھ ایسے لوک موجود نیں جو ساڈی اس پالیسی نوں بدلن دی کوشش کر رہے نیں، کیونکہ اوہ فوجی مہم (جنگ) نوں جاری رکھنا چاہندے نیں۔”

وینس نے آکھیا کہ اسرائیل، روس یا کسے وی دوجے ملک ولوں امریکی پالیسیاں اُتے اثر انداز ہون دی کوششاں اوہناں نوں پریشان نہیں کردیاں، کیونکہ 2026 وچ اک سیاسی لیڈر ہون دے ناطے ایہ عام جہی گل اے۔ پر اوہناں نے واضح کیتا کہ پریشانی اودوں ہوندی اے جے ایہ مہمات سچی مچی امریکا دے سیاسی فیصلیاں اُتے اثر پاؤن لگ پین۔ جے ڈی وینس نے اسرائیل ولوں ہون والی تنقید اُتے سخت ردعمل دیندے ہوئے چیتے کروایا کہ صدر ڈونلڈ ٹرمپ ہی اسرائیل دے واحد سچے اتحادی نیں، اوہناں نے اسرائیل نوں دتی جان والی ارباں ڈالر دی امریکی دفاعی امداد دا وی حوالہ دتا۔

جدوں وینس توں پچھیا گیا کہ کیا اسرائیل دے اثر توں بغیر امریکا حالیہ ایران جنگ وچ شامل ہوندا؟ تاں اوہناں نے جواب دتا: “جی ہاں، بالکل ہوندا۔” اوہناں دا کہنا سی کہ اسرائیلی اثر توں ہٹ کے، امریکی صدر خود ذاتی طور اُتے تے مضبوطی نال اس گل اُتے یقین رکھدے نیں کہ ایران کول جوہری ہتھیار نہیں ہونے چاہیدے۔ دوجے پاسے اسرائیلی عہدیداراں نے ناں ظاہر نہ کرن دی شرط اُتے اس معاہدے نوں اسرائیل دی سلامتی لئی ماڑا تے نقصان دہ قرار دتا اے، کیونکہ اوہناں دے مطابق اس وچ اسرائیل دے بنیادی تحفظات نوں دور نہیں کیتا گیا۔

زمینی فوج نہ گھلن دا اعلان تے ایران دا سخت جواب

اسے دوران امریکی نائب صدر جے ڈی وینس نے ایران وچ زمینی فوج گھلن دیاں خبراں نوں رد کر دتا اے۔ اوہناں نے آکھیا کہ امریکا ایران وچ حکومت بدلن لئی زمینی فوج نہیں گھلے گا، جے ایرانی عوام اپنے نظام وچ تبدیلی چاہندے نیں تاں ایہ اوہناں دا اپنا فیصلہ ہووے گا۔ امریکا دی ترجیح آبنائے ہرمز نوں کھلا رکھنا تے عالمی پدھر اُتے تیل تے گیس دی بلا تعطل ترسیل نوں یقینی بنانا اے۔ واضح رہے کہ اک امریکی اخبار نے امریکی اہلکاراں دے حوالے نال دعویٰ کیتا سی کہ صدر ڈونلڈ ٹرمپ نے ایران وچ زمینی فوج گھلن اُتے غور شروع کر دتا اے۔

دوجے پاسے ایران دے ‘خاتم الانبیاء’ مرکزی ہیڈکوارٹر دے ترجمان بریگیڈیئر جنرل ابراہیم ذوالفقاری نے آکھیا اے کہ جے امریکا نے ایرانی انفراسٹرکچر نوں نشانہ بنایا، تاں ایران دے فولادی وار خطے وچ امریکا دے بنیادی ڈھانچیاں دا ناں و نشان مٹا دین گے۔ جے امریکا نے حملے جاری رکھے تاں عرب ملکاں نوں واپس اونٹاں دے دور وچ پہنچا دتا جائے گا۔ ایران کسے بھی امریکی جارحیت دا بھرپور جواب دیوے گا تے کسے وی صورت امریکا نوں آبنائے ہرمز وچ مداخلت دی اجازت نہیں دیوے گا، آبنائے ہرمز ایران دی ناقابلِ عبور سرخ لکیر اے۔

ایرانی فوجی ترجمان محمد اکرمینیا نے آکھیا اے کہ جے امریکی فوجی کارروائیاں جاری رہیاں تاں جنگ نویں محاذاں تیکر پھیل سکدی اے، ایران نے اجے اپنی تمام عسکری صلاحیتاں دا مظاہرہ نہیں کیتا۔ ایرانی سپریم لیڈر دے مشیر علی اکبر ولایتی نے آکھیا کہ آبنائے ہرمز ایران دی ملکیت اے تے دنیا دی کوئی طاقت ایہنوں ایران توں نہیں کھوہ سکدی۔ ایہ آبی لنگھن والا رستہ سپریم لیڈر مجتبیٰ خامنہ ای دی جرات مندانہ تے دانشمندانہ قیادت وچ ایران دی خودمختاری دے دائرے وچ آیا اے، تے علی اکبر ولایتی نے ایہنوں 40 روزہ جنگ دی اک اہم کامیابی قرار دتا اے۔