“گلگت بلتستان اسمبلی: پاکستان دا صوبہ بناؤن دی قرارداد منظور”
عبوری صوبے دی حیثیت مسئلہ کشمیر اُتے پاکستان دا مؤقف متاثر نہیں کرے گی
تمام ارکان نے حمایت کیتی؛ وفاقی حکومت نوں آئینی، قانونی تے انتظامی اقدامات شروع کرن اتے این ایف سی ایوارڈ دین دی وی سفارش
گلگت، اسلام آباد (مانیٹرنگ ڈیسک)
گلگت بلتستان اسمبلی نے گلگت بلتستان نوں عبوری طور اُتے پاکستان دا صوبہ بناؤن دی متفقہ قرارداد منظور کر لئی اے۔ اسمبلی دے اجلاس وچ جی بی نوں پاکستان دا صوبہ بناؤن دی قرارداد جلال شاہ نے پیش کیتی جس دی تمام ارکان نے حمایت کیتی۔ قرارداد وچ گلگت بلتستان نوں پاکستان دے آئین وچ ترمیم کر کے عبوری طور اُتے پاکستان دا صوبہ بناؤن تے دوجے صوبیاں وانگوں این ایف سی (NFC) ایوارڈ وچ حصہ مقرر کرن دا مطالبہ کیتا گیا اے۔
تفصیلات دے مطابق، گلگت بلتستان اسمبلی دا لنگھے دن ڈپٹی سپیکر ملک کفایت الرحمن دی زیرِ صدارت اجلاس ہویا جس وچ رکن اسمبلی سید جلال شاہ نے گلگت بلتستان نوں عبوری صوبائی حیثیت دین بارے مشترکہ قرارداد پیش کیتی جس اُتے حکومتی تے اپوزیشن دے کئی ارکان دے دستخط سن۔
قرارداد وچ گلگت بلتستان نوں آئینی ترمیم راہیں عبوری صوبہ بناؤن، پاکستان دے دوجے صوبیاں دے برابر آئینی، سیاسی تے جمہوری حقوق فراہم کرن تے قومی پدھر اُتے مؤثر نمائندگی دین دا مطالبہ کیتا گیا۔ قرارداد وچ ہور آکھیا گیا کہ عبوری صوبائی حیثیت مسئلہ کشمیر اُتے پاکستان دے مؤقف نوں متاثر نہیں کرے گی تے نہ ہی ایہ اقوامِ متحدہ دیاں قرارداداں دے خلاف ہووے گی۔
قرارداد وچ وفاقی حکومت نوں آئینی، قانونی تے انتظامی اقدامات شروع کرن تے گلگت بلتستان لئی این ایف سی ایوارڈ دی سفارش بھی کیتی گئی۔ اس توں علاوہ، قرارداد وچ گلگت بلتستان دے لوکاں دی قومی وسائل وچ منصفانہ حصے داری دی حمایت وی کیتی گئی۔ ایوان نے گلگت بلتستان نوں عبوری صوبائی حیثیت دین بارے مشترکہ قرارداد متفقہ طور اُتے منظور کر لئی۔
