لوک دوست انصاف دے نظام لئی اداریاں دا تعاون لازمی: چیف جسٹس”
عدلیہ دا جاری اصلاحاتی ایجنڈا اثر دار نظامِ انصاف بنان اُتے مرکوز اے: یحییٰ آفریدی
اسلام آباد چیف جسٹس پاکستان یحییٰ آفریدی نے بہتر عدالتی انتظام، پیشہ ورانہ صلاحیت تے لوکاں نوں بہتر عدالتی خضمتاں دین لئی اداریاں دے تعاون تے بہترین طریقیاں دی سانجھ نوں لازمی قرار دتا اے
اوہناں نے آکھیا کہ عدلیہ دا جاری اصلاحاتی ایجنڈا لوکاں نوں مرکز بنان، ٹیکنالوجی نال جوڑن، شفاف تے اثر دار نظامِ انصاف قائم کرن اُتے مرکوز اے۔ جاری کیتے گئے اعلامیے دے مطابق، ایہناں خالات دا اظہار اوہناں نے سپریم کورٹ آزاد جموں و کشمیر دے افسراں دے وفد نال ملاقات وچ کیتا، جیہڑا ادارہ جاتی صلاحیت ودھان تے تجربیاں دی سانجھ دے پروگرام تحت سپریم کورٹ پاکستان دے دو روزہ دورے اُتے اے۔
وفد نوں جاری اصلاحاتی ایجنڈے، انتظامی تے عدالتی معاملیاں، ای-فائلنگ، ویڈیو لنک راہیں سماعت، ڈیجیٹل کیس مینجمنٹ سسٹم، نیشنل جوڈیشل اینالیٹکس ڈیش بورڈ، لوک سہولت مرکز تے ہور سدھاراں بارے دسا گیا۔ وفد نے سہولت مرکز، میوزیم تے آئی ٹی ڈائریکٹوریٹ دا دورہ کیتا تے عدالتی سدھاراں تے تکنیکی قدماں دی تعریف کیتی۔ اوہناں نے ڈیجیٹل نقلاں جاری کرن، کیس مینجمنٹ سمیت عدالتی ٹیکنالوجی دے شعبیاں وچ ادارہ جاتی تعاون دی پیشکش وی کیتی۔ دونویں اداریاں نے اثر دار، سستے تے لوک دوست نظامِ انصاف نوں ودھاؤن لئی سانجھیاں کوششاں جاری رکھن اُتے اتفاق کیتا۔
