طیارہ حادثہ: مبینہ جعلی لائسنس دے حامل پائلٹاں دے خلاف کاروائی لئی فہرست طلب

کراچی: طیارہ حادثے دی عبوری رپورٹ آن دے بعد پی آئی اے دا وڈا فیصلہ، سی ای او ایئر مارشل ارشد ملک نے مبینہ جعلی لائسنس دے حامل پائلٹاں دے خلاف کاروائی لئی ڈی جی سول ایوی ایشن توں پائلٹاں دی فہرست منگ لئی۔ پی آئی اے دے سی ای او ولوں پچھلے دو دناں دے دوران سول ایوی ایشن اتھارٹی حکام نوں دو خط لکھے گئے۔ ایئر مارشل ارشد ملک نے خط وچ آکھیا فوری طور تے جعلی لائسنس دے حامل کپتاناں دی لسٹ فراہم کیتی جائے، قواعد دے تحت کپتاناں دے خلاف فوری ایکشن لیا جائے گا، جعلی لائسنس دے حامل پائلٹاں نوں جہاز اُڈان نہیں دیاں گے۔ ایئر مارشل ارشد ملک دا کہنا سی جعلی لائسنس والے پائلٹس فلائٹ سیفٹی لئی شدید خطرہ نیں۔ اودھر چیف جسٹس پاکستان نے پائلٹاں دے جعلی لائسنساں دا نوٹس لیندیاں ڈی جی سول ایوی ایشن توں دو ہفتے وچ جواب طلب کر لیا۔ چیف جسٹس آکھیا سول ایوی ایشن پیسے لے کے پائلٹ نوں لائسنس جاری کردی اے، انج لگدا اے جیویں پائلٹ چلدا ہویا میزائل اُڈا رہے ہون، اوہ میزائل جہڑا کدھرے وی جا کے مرضی نال پھٹ جائے۔ چیف جسٹس گلزار احمد نے ریمارکس دتے دسیا گیا15ورھے پرانے جہاز وچ نقص نہیں، ملبہ پائلٹ تے سول ایوی ایشن تے پایا گیا، لگدا اے ڈی جی سول ایوی ایشن نوں بلانا پوے گا۔