ضم اضلاع وچ وفاقی ٹیکس نامنظور، فیصلہ واپس نہ ہویا تے سخت ردعمل دیاں گے: وزیر اعلیٰ پختونخوا
وفاق نال مذاکرات لئی وفد بنایا جائے گا، صوبائی حکومت ضم اضلاع وچ کوئی ٹیکس نہیں لے رہی: سہیل آفریدی
دہشت گردی دے خاتمے لئی ایکشن پلان تیار، امن و امان اُتے وکھرا جرگہ ہوئے گا: گرینڈ جرگے نال خطاب، سفارشاں اُتے غور
پشاور
وزیر اعلیٰ خیبر پختونخوا سہیل آفریدی نے آکھیا کہ ضم اضلاع وچ وفاقی ٹیکس نامنظور نیں، وفاقی حکومت نال مذاکرات لئی اک اعلیٰ پدھر دا وفد بنایا جائے گا، پر جے وفاق نے ٹیکس لاون دا فیصلہ واپس نہ لیا تے ایس اُتے سخت ردعمل دیاں گے۔ صوبائی حکومت ضم اضلاع وچ کوئی ٹیکس نہیں لے رہی، مالاکنڈ ڈویژن وچ سیلز ٹیکس آن سروسز وی واپس لین دا فیصلہ کیتا اے۔
اوہناں نے ایہناں خیالاں دا اظہار لنگھے دن ضم اضلاع تے سابقہ پاٹا وچ وفاقی ٹیکساں دے نفاذ دے خلاف وزیر اعلیٰ ہاؤس پشاور وچ کیتے گئے گرینڈ جرگے نال خطاب وچ کیتا۔ پختونخوا حکومت ولوں سدے گئے گرینڈ جرگے وچ گورنر پختونخوا فیصل کریم کنڈی، صوبائی کابینہ دے ممبر، پختونخوا نال تعلق رکھن والے سینیٹرز، سیاسی جماعتاں دے آگو، چونے ہوئے نمائندے، ضم اضلاع تے مالاکنڈ ڈویژن دے قومی و صوبائی اسمبلیاں دے ممبر تے تاجر آگو وی موجود سن۔ ایس موقعے اُتے ٹیکساں دے نفاذ دے معاملے اُتے وکھو وکھ سجھاواں تے سفارشاں اُتے غور کیتا گیا۔
وزیر اعلیٰ پختونخوا نے ہور آکھیا کہ صوبے دے مسلیاں اُتے ساریاں سیاسی جماعتاں تے آگواں دے تعاون دی سلاہنا کردے آں، لوکاں دا فائدہ حکومت دی پہلی ترجیح اے۔ دہشت گردی دے خاتمے لئی صوبائی ایکشن پلان تیار کیتا گیا اے جیہدے اُتے چنگے طریقے نال عمل کرن نال چار مہینیاں دے اندر امن دی صورتحال بہتر بنائی جا سکتی اے۔
سہیل آفریدی نے ہور اعلان کیتا کہ امن و امان دے معاملے اُتے وکھرا جرگہ جبکہ خیبر پختونخوا دے مالی حقاں لئی اسلام آباد وچ وی اک جرگہ کیتا جائے گا۔ ایس گرینڈ جرگے دا مقصد اکو جیہا لائحہ عمل تے سانجھی حکمتِ عملی طے کرنا اے، سارے متعلقہ سٹیک ہولڈرز نوں اپنیاں راواں تے سجھاء پیش کرن دا موقع دتا گیا اے۔
