اپنی چھت پراجیکٹ دی قسط وچ کمی: پنجاب وچ کوئی گھر اینا کمزور نہ ہوئے گا کہ خاندان تباہ کر دیوے: مریم
قسط 4700 توں 9300 ماہوار مقرر، گھر وچ وادھو کمرے، دوجی منزل لئی 10 لکھ دا بلا سود قرضہ لیا جا سکدا اے
کاہنہ دے شہید بچیاں دی یاد وچ پراجیکٹ پورٹل دا افتتاح، ڈبلیو ڈبلیو ایف دا ڈولفن دے تحفظ اُتے مریم نوں خراجِ تحسین
لاہور (سٹاف رپورٹر)
وزیر اعلیٰ پنجاب مریم نواز نے سانحہ کاہنہ دے شہید معصوم بچیاں دی یاد وچ “اپنی چھت، محفوظ چھت” پراجیکٹ پورٹل دا ڈیجیٹل افتتاح کر دتا۔ وزیر اعلیٰ دی ہدایت اُتے اپنی چھت، محفوظ چھت پراجیکٹ لئی ماہوار قسط نوں گھٹ کردیاں ہویاں 14 ہزار ماہوار دی بجائے تقریباً 4700 توں 9300 ماہوار قسط مقرر کیتی گئی اے۔ پنجاب دے شہری اپنے گھر دی چھت نوں محفوظ تے مضبوط بناون لئی 5 لکھ دا بلا سود قرضہ حاصل کر سکن گے۔ شہری اپنے گھر وچ وادھو کمرے، دوجی منزل وغیرہ بناون لئی وی 10 لکھ دا بلا سود لون لے سکن گے۔
صوبائی وزیر ہاؤسنگ بلال یاسین نے بریفنگ وچ دسیا کہ شہری acag.punjab.gov.pk اُتے اپنی چھت، محفوظ چھت دے لون لئی اپلائی کر سکدے نیں، ڈپٹی کمشنر آفس، اے سی آفس تے پھاٹا (PHATA) دے دفتراں توں وی اپنی چھت، محفوظ چھت لئی اپلائی کیتا جا سکدا اے۔ اپنی چھت، محفوظ چھت پراجیکٹ لئی ہیلپ لائن 09100-0800 اُتے وی رابطہ کیتا جا سکدا اے۔ پراجیکٹ دے تحت 2 کھرب 24 ارب 45 کروڑ 70 لکھ دے 1 لکھ 73 ہزار 158 بلا سود قرضے جاری کیتے گئے۔
مریم نواز نے خطاب کردیاں ہویاں آکھیا کہ گھر صرف اٹاں پتھراں دا اکٹھ نہیں بلکہ تحفظ دی نشانی اے۔ گھر انج محفوظ ہوندا اے کہ بچے ماں نال تحفظ محسوس کردے نیں، کاہنہ وچ ہون والا سانحہ دل ہلا دین والا سی، تعمیر دے دوران چھت ڈگن نال 14 معصوم بچے چلے گئے۔ سانحہ کاہنہ دی وجہ توں میں رات بھر سو نہ سکی، جنہاں ماں پیو دے بچے دنیا توں چلے گئے اوہناں دا کیہ حال ہوئے گا، ماں دا دکھ کوئی ماں ہی جان سکدی اے۔ میں سانحہ کاہنہ دی متاثرہ ماں دا نہ مکنے والا دکھ دیکھیا تے محسوس کیتا، اج اسیں پورے پنجاب لئی اہم اعلان کرن جا رہے آں۔ ہر گھر نوں محفوظ بناون لئی اپنی چھت، محفوظ چھت پراجیکٹ شروع کیتا اے۔ دو لکھ خاندان کرائے دے گھراں توں اپنی چھت تھلے آ گئے۔
کمزور تے خستہ حال چھتاں نوں محفوظ کرن لئی بہت سوکھ نال قرضہ مل سکدا اے، پنج لکھ روپے قرضے لئی 4700 روپے ماہوار 9 سالاں وچ ادا کرنے ہون گے۔ لون دی پراسس فیس تے دوجے واجبات حکومت آپ ادا کرے گی، لمبے چوڑے پروسیجر دی بجائے شناختی کارڈ (CNIC) دے نال پنجاب دا ہر شہری اپلائی کر سکدا اے۔ لوکاں دی سہولت لئی سوکھیاں شرطاں تے سوکھی ماہوار قسط رکھ رہے آں۔ مریم نواز نے آکھیا کہ اک توں ودھ رہن والے خانداناں لئی وادھو کمرے تے نویں منزل بناون لئی 10 لکھ روپے بلا سود قرضہ دیاں گے۔ اپنی چھت، محفوظ چھت پروگرام دے لون دے جاری ہون توں بعد تن مہینے گریس پیریڈ ہوئے گا، چوتھے مہینے قسط دینی ہوئے گی۔ “اپنی زمین اپنا گھر” لئی دو ہزار پلاٹاں دی الاٹمنٹ مل چکی اے، اپنی زمین اپنا گھر دے الاٹی وی 15 لکھ لون لئی اپلائی کر سکدے نیں۔ اج توں بعد پنجاب وچ کوئی گھر اینا کمزور نہیں ہوئے گا کہ کسی خاندان نوں تباہ کر دیوے۔
ایسے دوران دنیا دی سب توں وڈی غیر سرکاری ماحولیاتی تحفظ دی تنظیم ورلڈ وائلڈ لائف فنڈ (امریکا) نے نایاب نسل دی ڈولفن دے تحفظ لئی اہم سنگِ میل عبور کرن اُتے وزیر اعلیٰ پنجاب مریم نواز نوں خراجِ تحسین پیش کیتا اے۔ ورلڈ وائلڈ فنڈ تنظیم نے نایاب ہوندی ڈولفن دی نسل نوں بچاون تے افزائش لئی “پنجند انڈس ریور ڈولفن سینکچواری” قائم کرنا مریم نواز دا تاریخی قدم قرار دتا۔ وزیر اعلیٰ مریم نواز دی ہدایت اُتے سینئر صوبائی وزیر مریم اورنگزیب نے ایہ محفوظ علاقہ بناون دا منصوبہ شروع کیتا، ڈولفن لئی ایہ محفوظ تے خاص علاقہ دریائے سندھ دے تقریباً 123 میل لمی پٹی اُتے پھیلا ہویا اے۔ ایس سینکچواری وچ اوہ تاریخی تھاں وی شامل اے جتھے پنجاب دے پنجے دریا آپس وچ ملدے نیں، نویں سینکچواری سندھ وچ پہلے توں موجود محفوظ علاقے نال وی جڑ جائے گی، مجموعی طور اُتے تقریباً 249 میل لما لگاتار دریا دا علاقہ قانونی تحفظ دے دائرے وچ آ جائے گا۔
