مولانا نال کیتے وعدے بھُلائے گئے، شکوہ کرنا اوہناں دا حق اے: نجم سیٹھی
جذبات وچ اک جملہ کہہ گئے، اوسی اُتے پوری مہم چل پئی، اصل گل نظرانداز کر دتی گئی
ہر سیاستدان اپنے ویلے اُتے اسٹیبلشمنٹ اُتے تنقید کردا رہا: “آج کی بات، سیٹھی کے ساتھ”
لاہور (مانیٹرنگ ڈیسک)
سینئر تجزیہ کار نجم سیٹھی نے آکھیا اے کہ مولانا فضل الرحمان جذبات وچ اک ایسا جملہ کہہ گئے جیہدے اُتے اسٹیبلشمنٹ خوش نہیں، اوسی پاروں اوہناں دے خلاف مہم شروع ہو گئی، حالانکہ اوہناں دی اصل گل نوں نظرانداز کر دتا گیا۔ دنیا نیوز دے پروگرام “آج کی بات، سیٹھی کے ساتھ” وچ گفتگو کردیاں ہویاں اوہناں نے آکھیا کہ جے مولانا وضاحت کر دین کہ اوہناں دی مراد شہدا دی بے حرمتی نہیں سی تے جھگڑا مک سکدا اے، کیونکہ اوہناں دی زبان پھسل گئی سی تے اوہناں دا مقصد اوہ نہیں سی جیہڑا لیا گیا۔
نجم سیٹھی نے آکھیا کہ آئینی ترامیم دے ویلے مولانا فضل الرحمان توں تعاون لیا گیا، اوہناں نوں صدر بناؤن سمیٹ کئی وعدے کیتے گئے پر پورے نہیں ہوئے، اوسی لئی اوہ ناراض نیں۔ اوہناں دے آکھن موجب 28ویں آئینی ترمیم وی رکی ہوئی اے، ایس لئی مولانا نے محسوس کیتا کہ ہن اپنیاں شکوے شکایتاں سامنے لیاؤن دا ویلا اے۔ اوہناں نے آکھیا کہ مولانا حکومت دے وڈے حمایتی رہے نیں، ایس دے باوجود اوہناں نوں نظرانداز کیتا گیا، ایس لئی شکایت کرنا اوہناں دا حق بندا اے۔
اوہناں نے آکھیا کہ بے نظیر بھٹو، ذوالفقار علی بھٹو، نواز شریف، عمران خان، خواجہ آصف تے محمود خان اچکزئی سمیٹ تقریباً ہر وڈے سیاستدان نے اپنے اپنے دور وچ اسٹیبلشمنٹ اُتے تنقید کیتی تے بعد وچ سیاسی رعایت وی حاصل کیتی، پر مولانا فضل الرحمان نوں ایسی کوئی رعایت نہیں ملی۔
