وکلا برادری دا ہر اوکھے ویلے (مشکل میں) ساتھ دیاں گے: گورنر پنجاب

جمہوریت دی مضبوطی تے عدلیہ دی بحالی وچ وکلا دا وڈا ہتھ اے، وکلا برادری پیپلز پارٹی دا موہری دستہ (ہراول دستہ) اے: سردار سلیم حیدر خان

بلاول بھٹو زرداری نے بہت گھٹ ویلے وچ اپنی صلاحیتاں دا لوہا منوایا، گورنر ہاؤس دے بوہے وکلا لئی ہمیشاں کھلے نیں

لاہور (سپیشل رپورٹر)

گورنر پنجاب سردار سلیم حیدر خان نے آکھیا اے کہ جمہوریت دے استحکام تے عدلیہ دی بحالی وچ وکلا دا اہم کردار اے، وکلا برادری پیپلز پارٹی دا موہری دستہ نیں، اوہناں دا ہر اوکھے ویلے ساتھ دیاں گے۔ بلاول بھٹو زرداری نے بہت گھٹ ویلے وچ اپنی صلاحیتاں دا لوہا منوایا اے۔

ایہناں خیالاں دا اظہار اوہناں نے گورنر ہاؤس لاہور وچ میانوالی بار دے صدر امیر اسلم خان دی اگوائی وچ آئے وفد، پی ایل ایف پاکپتن دے عہدیداراں، صدر پی ایل ایف لاہور ڈویژن شاہد عباس سنے دوجے وکلا نال ملاقات دوران گل بات کردیاں کیتا۔ گورنر پنجاب نے ہور آکھیا کہ لوکاں نوں بنا کسے فرق دے انصاف دی فراہمی پکی کر کے ای اک پرامن معاشرہ بنیا جا سکدا اے۔ ملک وچ جمہوریت دی مضبوطی تے عدلیہ دی آزادی لئی وکلا دی مِثال جدوجہد تریخ دا حصہ اے، پی ایل ایف دیاں عدلیہ دی آزادی تے جمہوری قادراں نوں اگے ودھاؤن لئی خدمات سلاہن جوگ (قابلِ تحسین) نیں، پیپلز پارٹی اپنے وکلا دا ساتھ کدی نہیں چھڈے گی۔

سلیم حیدر نے آکھیا کہ بلاول بھٹو نے عالمی پدھر (سطح) اُتے انڈیا دا مکروہ چہرہ ننگا کیتا، اوہ ساڈیاں آؤن والیاں نسلاں دے ہیرو تے آس دی کرن نیں۔ میں پارٹی ورکر تے پیپلز پارٹی دا جیالا واں۔ ایس موقعے اُتے میانوالی بار دے وکلا نے گورنر پنجاب نوں میانوالی بار دے دورے دا سدا (دعوت) دِتا، جیہنوں اوہناں نے ہس کے قبول کیتا تے آکھیا کہ اوہ چھیتی ای میانوالی دا دورہ کرن گے۔