پہلی واری 2 ہزار توں ودھ ای-گاڈیاں (الیکٹرک گاڈیاں) کراچی اپڑ گیاں

پاکستان دی تریخ وچ پہلی واری رورو شپمنٹ راہیں 2 ہزار توں ودھ الیکٹرک گاڈیاں کراچی پورٹ اپڑ گیاں

ایم وی گرینڈے شنگھائی کامیابی نال لنگرانداز، پہلی رورو ای وی شپمنٹ جدید بندرگاہی نظام ول وڈا قدم اے، وزیر بحری امور

کراچی (آئی این پی)

پاکستان دی تریخ وچ پہلی وار رورو (Ro-Ro) شپمنٹ راہیں 2 ہزار توں ودھ الیکٹرک گاڈیاں (ای وی) کراچی پورٹ اپڑ گیاں نیں۔ ملکی بحری تے تجارتی تریخ وچ ایہ اک وڈی تے اہم پیشرفت ساہمنے آئی اے۔ ترجمان وزارتِ بحری امور دے مطابق، مال بردار جہاز “ایم وی گرینڈے شنگھائی” کامیابی نال کراچی پورٹ دے ٹرمینل اُتے لنگرانداز ہو گیا اے، تے ایس جہاز راہیں الیکٹرک گاڈیاں دی ایہ وڈی کھیپ ملک وچ لیاندی گئی اے۔

وفاقی وزیرِ بحری امور جنید انوار چودھری نے اپنے بیان وچ آکھیا کہ رورو جہاز راہیں پہلی واری الیکٹرک گاڈیاں دی آمد پاکستان دی بحری تجارت لئی اک تریخی سنگِ میل اے۔

وفاقی وزیر نے ہور آکھیا کہ کراچی پورٹ اُتے پہلی رورو ای وی شپمنٹ جدید بندرگاہی نظام ول اک اہم قدم اے، جیہڑی ملک دیاں تجارتی سرگرمیاں نوں ہور کھلارن (وسعت دین) وچ مددگار ثابت ہوئے گی۔