بنوں: سکیورٹی فورسز دا آپریشن، بھارتی حمایت یافتہ 24 خوارج ہلاک

بنوں وچ سکیورٹی فورسز دی وڈی کارروائی، بھارتی پراکسی “فتنہ الخوارج” دے 24 دہشت گرد ہلاک

ہلاک خوارج معصوم شہریاں دے قتل تے حملیاں وچ ملوث سن، معصوم لوکاں نوں نشانہ بنان والے کسے رعایت دے حقدار نہیں، صدر تے وزیرِ اعظم دا عزم

راولپنڈی، اسلام آباد

سکیورٹی فورسز نے بنوں تے نال لگدے علاقےآں وچ وڈیاں کارروائیاں کردیاں ہویاں 24 خوارج نوں ہلاک کر دتا اے۔ آئی ایس پی آر (ISPR) ولوں جاری کیتے گئے بیان دے مطابق، بنوں ضلع وچ حالیہ دہشت گردی دیاں وارداتاں، پولیس اُتے حملیاں تے گڈی وچ فِٹ خودکش بم دھماکے توں بعد سکیورٹی فورسز نے قانون نافذ کرن والے اداریاں نال مل کے وڈے پدھر اُتے انٹیلی جنس بیسڈ سانجھے آپریشن شروع کیتے نیں۔

لنگھے 24 گھنٹیاں دے دوران بنوں تے نال دے علاقےآں وچ سخت فائرنگ دے تبادلے توں بعد بھارتی پراکسی “فتنہ الخوارج” نال تعلق رکھن والے 24 دہشت گرد مارے گئے نیں۔ ہلاک ہون والے خوارج توں بھاری مقدار وچ اسلحہ تے گولا بارود وی برآمد ہویا اے۔ ایہ دہشت گرد کئی کارروائیاں تے بے گناہ شہریاں دے قتل وچ ملوث سن۔ آئی ایس پی آر دا کہنا اے کہ علاقے وچ آپریشن اجے وی جاری رہن گے تے ایہناں بزدلانہ حملیاں دے ذمہ داراں تے اوہناں دے سہولت کاراں نوں انصاف دے کٹہرے وچ لیاندا جائے گا۔ وفاقی ایپکس کمیٹی دے منظور کیتے گئے نیشنل ایکشن پلان دے تحت “عزمِ استحکام” دے وژن دے مطابق سکیورٹی فورسز دی ایہ کارروائیاں پوری طاقت نال جاری رہن گیاں۔

صدرِ مملکت آصف علی زرداری نے سکیورٹی فورسز نوں خراجِ تحسین پیش کردیاں آکھیا کہ 24 دہشت گرداں نوں ہلاک کرنا فورسز دی پیشہ ورانہ مہارت تے عزم دا ثبوت اے؛ معصوم لوکاں نوں نشانہ بنان والے کسے رعایت دے مستحق نہیں۔ وزیرِ اعظم شہباز شریف نے آکھیا کہ دہشت گردی دے ناسور تے ایہدی سہولت کاری دا مکمل خاتمہ حکومت دی اولین ترجیح اے۔ بھارتی سرپرستی وچ چلن والے دہشت گرد عناصر دے ناپاک ارادیاں نوں ہر قیمت اُتے ناکام بنایا جائے گا۔ وفاقی وزیرِ داخلہ محسن نقوی نے وی بنوں آپریشن دی کامیابی نوں سراہندیاں آکھیا کہ ایہ کارروائی دیس نوں دہشت گردی توں پاک کرن دے پکے عزم دا منہ بولدا ثبوت اے۔