پمپ اونرز، پٹرولیم ڈیلرز ایسوسی ایشن دی ہڑتال دی دھمکی

پٹرولیم پالیسی مسترد، مسلیاں دا بوجھ پمپ مالکان اُتے نہ پایا جائے: نعمان بٹ؛ ڈی ریگولیشن دا طریقہ کار کیہ ہوئے گا، حکومت سانوں اعتماد وچ لوے: عرفان الٰہی

اسلام آباد، لاہور (خصوصی نیوز رپورٹر، مانیٹرنگ ڈیسک) آل پاکستان پٹرول پمپ اونرز تے پاکستان پٹرولیم ڈیلرز ایسوسی ایشن نے نویں پٹرولیم پرائس ڈی ریگولیشن پالیسی نوں مسترد کردے ہوئے ہڑتال دی دھمکی دے دتی۔ پٹرول پمپ اونرز ایسوسی ایشن دے چیئرمین نعمان علی بٹ نے آکھیا کہ فیصلہ واپس نہ لیا گیا تے اگلے ہفتے احتجاج تے ہڑتال اُتے غور کراں گے، اوہناں نے مطالبہ کیتا کہ حکومت اپنی پالیسی اُتے مڑ غور کرے، مسلیاں دا بوجھ پٹرول پمپ مالکان اُتے نہ پایا جائے، او ایم سیز (OMCs) دے نال ریٹ طے کرن توں پہلے سارے سٹیک ہولڈرز نوں اعتماد وچ لیا جائے، ملک بھر دے نیرے تیرے 15 ہزار پٹرول پمپ مالکان ڈونگھے تحفظات دا شکار نیں۔

نعمان علی بٹ نے آکھیا کہ نویں پالیسی نال آئل ٹینکرز، ٹرانسپورٹیشن تے قیمتاں طے کرن دا نظام متاثر ہوئے گا، حکومت یکطرفہ فیسلیاں دے بجائے پٹرول پمپ مالکان نال صلاح مشورہ کرے۔ دوجے پاسے پاکستان پٹرولیم ڈیلرز ایسوسی ایشن دے سینئر وائس چیئرمین چودھری عرفان الٰہی نے خبردار کیتا اے کہ جے اے فیصلہ واپس نہ لیا گیا تے ملک گیر احتجاج تے ہڑتال دے آپشن اُتے غور کیتا جائے گا، اوہناں نے مطالبہ کیتا کہ حکومت نویں پالیسی بارے پاکستان پٹرولیم ڈیلرز ایسوسی ایشن نوں اعتماد وچ لوے تے صاف کرے کہ مجوزہ ڈی ریگولیشن دا طریقہ کار تے میکنزم کیہ ہوئے گا۔

اوہناں آکھیا کہ آئل مارکیٹنگ کمپنیاں (او ایم سیز) دے نال ریٹ طے کرن توں پہلے سارے سٹیک ہولڈرز نال صلاح مشورہ تے اتفاقِ رائے ضروری اے، کیوں جے یکطرفہ فیصلے نہ صرف پٹرول پمپ مالکان بلکہ پورے پٹرولیم سیکٹر لئی مشکلاں کھڑیاں کرن گے۔پٹرولیم پالیسی مسترد، مسلیاں دا بوجھ پمپ مالکان اُتے نہ پایا جائے: نعمان بٹ؛ ڈی ریگولیشن دا طریقہ کار کیہ ہوئے گا، حکومت سانوں اعتماد وچ لوے: عرفان الٰہی