خواجہ آصف بارے بلاول دا رویہ چنگا نہیں، ایکشن کمیٹی نوں کالعدم فیصل راٹھور نے کیتا؛ ن لیگ وچ لت مار کے کڈن دی ریت نہیں، بلاول ووٹ لئی نفرت نہ کھلارن : رانا ثناء اللہ
لاہور: (مانیٹرنگ ڈیسک) وزیراعظم دے مشیر رانا ثناء اللہ نے بلاول بھٹو زرداری دے بیان نوں نامناسب قرار دتا اے۔ رانا ثناء اللہ نے آکھیا اے کہ بلاول بھٹو زرداری دیاں تقاریراں حالات خراب کر سکدیاں نیں۔ خواجہ آصف دے بارے وچ بلاول دا رویہ چنگا نہیں سی، ووٹ لئی نفرت نہ کھلارن بلکہ اوہناں نوں قومی لیڈر بن کے گل کرنی چاہیدی اے۔ مسلم لیگ ن وچ کسے نوں لت مار کے کڈن دی ریت نہ سی تے نہ ای اے۔
اوہناں ہور آکھیا کہ جوائنٹ ایکشن کمیٹی نوں آزاد کشمیر دے وزیراعظم فیصل راٹھور نے کالعدم قرار دتا، وفاقی حکومت نے ایس فیصلے دی حمایت کیتی۔ وفاقی حکومت ایس فیصلے دی پٹھ (پشت) تے کھلوتی اے تے بلاول بھٹو زرداری اشاریاں تے گلاں گلاں وچ ایس فیصلے دی مخالفت کر رہے نیں۔
چیتے رہے (یاد رہے) کہ دو دن پہلاں بلاول بھٹو زرداری نے وزیرِ دفاع خواجہ آصف نوں وفاقی کابینہ توں کڈن دا مطالبہ کیتا سی تے آکھیا سی کہ کشمیر دے معاملے تے وزیرِ دفاع دا بیان وفاقی حکومت دی پالیسی ہے یا نہیں؟ وزیراعظم شہباز شریف نوں ایس تے وضاحت دینی چاہیدی اے۔
