پاکستان تے فرانس دا تجارت، سرمایہ کاری تے تعلیمی تعاون نوں ہور مضبوط بناؤن دا عزم

باسٹیل ڈے تقریب، سفارتکاراں تے اہم ہستیاں دی شرکت، پرتکلف کھانیاں نال تواضع، دوہاں ملکاں وچالے تجارتی تعلقات ہور اگے ودھن گے، وفاقی وزیر خزانہ دا خطاب

اسلام آباد (الماس حیدر نقوی) پاکستان تے فرانس نے اقتصادی تعاون، سرمایہ کاری، تعلیم تے عوامی رابطیاں نوں ہور فروغ دین دے اپنے عزم نوں دہرایا اے۔ ایہہ اظہارِ عزم اسلام آباد وچ فرانسیسی سفارت خانے ولوں کروائی گئی یادگار ‘باسٹیل ڈے’ دی استقبالیہ تقریب وچ کیتا گیا جس وچ وفاقی حکومت دے اعلیٰ افسراں، سفارتکاراں، کاروباری ہستیاں تے سول سوسائٹی دے نمائندیاں نے شرکت کیتی۔ فرانسیسی سفیر دی رہائش گاہ دے کھلے لان وچ ہون والی ایس باوقار تقریب نوں شاندار مہمانی تے بہترین انتظاماں پاروں لمے چمے تیکر یاد رکھیا جائے گا۔ گرمی دی شدت گھٹ کرن لئی پوری جگہ اُتے نویں چلرز لائے گئے سن جس نال مہماناں نے خوشگوار ماحول وچ تقریب دا مزہ لیا۔

آئے ہوئے مہماناں دی سیوا لئی روایتی فرانسیسی کھانیاں دا پرتکلف بندوبست کیتا گیا سی جنہاں وچ مشہور ‘فروماج ای ڈو پین’ (پنیر تے روٹی)، اعلیٰ معیار دے گوشت تے بیف نال تیار خاص پکوان تے فرانسیسی سٹائل دیاں لذیذ مٹھائیاں شامل سن۔ ایس موقعے اُتے مہمانِ خصوصی وزیر خزانہ محمد اورنگزیب نے آکھیا کہ پاکستان تے فرانس دے تعلقات خاص طور اُتے تجارت، سرمایہ کاری تے کاروباری شعبیاں وچ لگاتار مضبوط ہو رہے نیں۔ وزیر خزانہ نے امید جتائی کہ دوہاں ملکاں وچالے تجارتی تعلقات ہور اگے ودھن گے۔ پاکستان وچ فرانس دے سفیر نکولس گالے نے اپنے خطاب وچ خطے وچ امن قائم کرن لئی پاکستان دی سفارتی کوششاں، خاص طور اُتے خلیجی جھیڑے دے پرامن حل لئی کردار نوں سلاہیا تے عالمی قنوناں تے کثیرالجہتی نظام لئی فرانس دے عزم نوں دہرایا۔