قدرتی آفتاں توں بچاء، چین دے تعاون نال نواں سسٹم متعارف

اے آئی اُتے مبنی فورکاسٹ جنریٹر آپریشنل پیش گوئیاں دے معیار وچ وڈی بہتری لیائے گا، مصنوعی ذہانت اُتے مبنی نویں ملٹی ہیزرڈ ارلی وارننگ سسٹم نال ٹھیک پیش گوئی ممکن ہووے گی

اسلام آباد (مانیٹرنگ ڈیسک) محکمہ موسمیات نے چینی محکمہ موسمیات دے تعاون نال مصنوعی ذہانت (AI) اُتے مبنی نواں ‘ملٹی ہیزرڈ ارلی وارننگ سسٹم’ متعارف کروا دتا اے، جس دا مقصد ملک وچ قدرتی آفتاں دی ویلے سِردی پیش گوئی تے اثر دار وارننگ دین دی صلاحیت نوں بہتر بنانا اے۔ محکمہ موسمیات ولوں جاری کیتے گئے بیان وچ دسیا گیا کہ ایہہ نواں، کلاؤڈ بیسڈ پلیٹ فارم وکھ وکھ موسمیاتی ماڈلاں نوں اکٹھا کر کے ملک دے کسے بھی تھاں لئی اینسمبل فورکاسٹ تیار کرن دی صلاحیت رکھدا اے۔ ایس سسٹم نال ہڑھ (سیلاب)، سوکے (خشک سالی)، گلیشیائی جھیلاں دے پھٹن تے ہور سخت موسمی واقعیاں دی زیادہ ٹھیک تے ویلے سِردی پیش گوئی ممکن ہووے گی۔

بیان وچ آکھیا گیا کہ اے آئی اُتے مبنی فورکاسٹ جنریٹر آپریشنل پیش گوئیاں دے معیار وچ وڈی بہتری لیائے گا، جیہدے نال متعلقہ اداریاں نوں ویلے سِر فیصلے کرن وچ مدد ملے گی تے قیمتی جاناں بچاؤن تے مالی نقصان گھٹ کرن وچ ہتھ ونڈایا جا سکے گا۔ محکمہ موسمیات نے آکھیا کہ پاکستان تے چین وچالے ایہہ تعاون ہن صرف سسٹم لان تیکر محدود نئیں سگوں سانجھی تحقیق، جدت تے مصنوعی ذہانت اُتے مبنی موسمیاتی خزمتاں نوں اگے ودھاؤن تیکر پھیل چکا اے۔