نورین نیازی دا بیان مذمت جوگ ایہ پاکستان مخالف پراکسیاں نیں: وفاقی وزیر
عوام وچ شدید غصہ تے دکھ، سیاست لئی ریاست دی بے توقیری منظور نہیں، آزاد کشمیر الیکشن بوہت اہم نیں: عطا تارڑ؛ بیان پاکستان دی سلامتی، عزت تے وقار دے خلاف اے: طارق فضل؛ قانونی کارروائی شروع کر دتی گئی اے: طلال چوہدری
لاہور، اسلام آباد (نیوز ایجنسیاں، مانیٹرنگ ڈیسک) وفاقی وزراء نے آکھیا اے کہ معرکہ حق اک تریخی کامیابی اے، بانی پی ٹی آئی دی بھین نورین نیازی دا بیان مذمت جوگ تے افسوسناک اے، اوہناں دے بیانات بھارتی میڈیا دی زینت بنے، بانی پی ٹی آئی دا ٹبر (خاندان) پاکستان دے خلاف پراکسیاں دا کردار ادا کر رہیا اے، بیان اُتے قانونی کارروائی شروع کر دتی گئی اے۔
ایہناں خیالاں دا اظہار وفاقی وزراء عطا اللہ تارڑ، طارق فضل چوہدری تے طلال چوہدری نے نورین نیازی دے متنازع بیان اُتے اپنے وکھو وکھ ردعمل وچ کیتا۔
وفاقی وزیرِ اطلاعات و نشریات عطا اللہ تارڑ نے لاہور وچ اک تقریب نال خطاب کردیاں آکھیا کہ بانی پی ٹی آئی دی بھین نورین نیازی نے اپنے بھرا دی سیاست پچھے ایہو جیہے بیان دتے جیہڑے بھارتی میڈیا دی زینت بنے، اوہناں دے بیان اُتے عوام وچ شدید غصہ پایا جا رہیا اے، سیاست دی خاطر ریاست دی بے توقیری قبول نہیں۔ پی ٹی آئی دی منفی ہتھکنڈے ورتن والی سیاست دفن ہو چکی اے۔ اوہناں آکھیا کہ ایہ اپنی سیاست لئی پاکستان نوں بدنام کرنا چاہندے نیں، پاکستان نوں بدنام کرن دی کوشش کرن والیاں نوں ہمیش خوار ہونا پیا اے، اج پوری دنیا وچ پاکستان دی عزت تے وقار ودھیا اے تے ایہ سفر ہمیش جاری رہے گا۔
اوہناں آکھیا کہ کشمیریاں دا اک ہی نعرہ اے، “کشمیر بنے گا پاکستان” جدکہ پوری دنیا دے کشمیریاں دے دل پاکستان دے نال دھڑکدے نیں، ہجرت کرن والیاں دیاں قوربانیاں تریخ وچ ہمیش زندہ رہن گیاں تے کشمیری مہاجراں دی حب الوطنی نوں شک دی نگاہ نال نہیں دیکھن دتا جائے گا، کشمیر کاز دے خلاف ہر سازش نوں ناکام بناواں گے، جلاؤ گھیراؤ تے تشدد دی سازش نوں وی ناکام بنایا جائے گا، آزاد جموں و کشمیر دے آؤن والے الیکشن بوہت اہمیت رکھدے نیں۔
وفاقی وزیرِ پارلیمانی امور طارق فضل چوہدری نے میڈیا نال گل بات کردیاں آکھیا اے کہ عمران خان تے اوہناں دی فیملی پاکستان مخالف بیان دا کوئی موقع ہتھوں جان نہیں دیندے، نورین نیازی دے بیان دی جنی مذمت کیتی جائے گھٹ اے، ایہ پاکستان دی سلامتی، عزت تے وقار دے خلاف اے۔ بھارت دے خلاف آپریشن بنیان مرصوص نے پوری دنیا نوں حیران کر دتا، معرکہ حق بارے نورین نیازی دا بیان انتہائی افسوسناک اے۔
وزیرِ مملکت برائے داخلہ طلال چوہدری نے آکھیا کہ بانی پی ٹی آئی تے اوہناں دے ٹبر دا نشانہ پاکستان نوں نقصان پہنچانا اے، بھارت اسرائیل گٹھ جوڑ دے باوجود پاکستان نے معرکہ حق وچ فتح حاصل کیتی، نورین نیازی دے بیان توں ثابت ہویا کہ ایہ پاکستان مخالف پراکسیاں نیں، پی ٹی آئی نے پاکستان نوں ڈیفالٹ کران لئی آئی ایم ایف نوں خط لکھے سن، پاکستان نوں بے امنی ول دھکن والیاں دے خلاف ایکشن ہووے گا، نورین نیازی دے بیان اُتے قانونی کارروائی شروع کر دتی گئی اے، اوہنوں دسنا پئے گا کہ ایہو جیہا بیان کیوں دتا؟ اوہناں دی دوجی بھین وی ایس طرحاں دیاں گلاں کر چکی اے
