موسمیاتی تبدیلی غذائی سلامتی لئی وڈا چیلنج؛ کنک تے چاول دی پیداوار وچ کمی دا ڈر

چکوال، فیصل آباد، شیخوپورہ، حیدرآباد، بدین، بہاولپور، ملتان تے ہور علاقیاں وچ کنک دی پیداوار وچ 16 فیصد تیکر کمی ہو سکدی اے؛ گرمی وچ فصلاں لئی پانی دی لوڑ ودھ رہی اے، موسم دے ہیساب نال زراعت اپناونی پئے گی: ترجمان موسمیاتی تبدیلی

اسلام آباد

موسمیاتی تبدیلی دے ودھدے ہوئے اثرات پاکستان دی غذائی سلامتی لئی سنگین خطرہ بندے جا رہے نیں۔ گرمی پد (درجہ حرارت) وچ مسلسل وادھا، بے وقتیاں بارشاں، ہڑھ (سیلاب)، سوکا (خشک سالی) تے پانی دی تھوڑ پاروں کنک تے چاول سمیت اہم فصلاں دی پیداوار وچ وڈی کمی دا ڈر اے۔ ودھدی ہوئی گرمی پاروں فصلاں لئی پانی دی لوڑ ودھ رہی اے جڈوں کہ پانی دے ذمے دار وسیلے گھٹ ہوندے جا رہے نیں۔

وزارتِ موسمیاتی تبدیلی دے ترجمان تے موسمیاتی پالیسی دے ماہر محمد سلیم شیخ نے آکھیا اے کہ موسمیاتی تبدیلی ہن صرف ماحول دا مسئلہ نہیں سگوں پاکستان دی قومی غذائی سلامتی دا وڈا چیلنج بن چکی اے۔ اوہناں دے مطابق گرمی دیاں شدید لہراں (ہیٹ ویوز)، ہڑھ تے سوکا زرعی پیداوار تے پانی دے وسیلیاں تے مسلسل دباؤ ودھا رہے نیں۔

اوہناں آکھیا کہ پاکستان نوں فوراً موسم دے موافق زراعت اپناونی پئے گی، جس وچ موسم دے اثرات جھلن والیاں فصلاں دیاں نویاں قسماں، جدید آبپاشی نظام، سائنسی تحقیق تے بہتر زرعی طریقے شامل نیں۔ اوہناں دا کہنا سی کہ درجہ حرارت وچ وادھا کساناں، خوراک دی سپلائی تے ملکی معیشت لئی خظریاں وچ وادھا کر رہا اے۔

وزارتِ موسمیاتی تبدیلی دے تحقیقی ادارے ‘گلوبل چینج امپیکٹ سٹڈیز سینٹر’ دے مطابق صدی دے آخر تیکر پاکستان وچ اوسط درجہ حرارت عالمی اوسط توں وی زیادہ ودھن دا امکان اے۔ تحقیقی ماڈلز دے ہیساب نال فیصل آباد، شیخوپورہ، حیدرآباد، بدین، بہاولپور، ملتان تے ہور زرعی علاقیاں وچ کنک دی پیداوار وچ 3 توں 16 فیصد تیکر کمی ہو سکدی اے، جڈوں کہ پوٹھوہار دے بارانی علاقیاں، اچیچے طور تے چکوال وچ ایہہ کمی تقریباً 16 فیصد تیکر پہنچن دا خطرہ اے۔

محمد سلیم شیخ نے آکھیا کہ چاول دی پیداوار وی شدید خظریاں وچ گھری ہوئی اے تے ودھدی گرمی پاروں ملک دے وڈے چاول پیدا کرن والے علاقیاں وچ صدی دے آخر تیکر پیداوار وچ 12 توں 22 فیصد تیکر کمی متوقع اے۔ سلیم شیخ نے ایس گل تے زور دتا کہ حکومت، سائنسی ادارے، کسان تے ہور متعلقہ دھریاں رل مل کے سانجھی حکمتِ عملی تیار کرن۔