پاکستان تے وینزویلا دا کئی شعبیاں وچ تعاون ودھان تے اتفاق

اسحاق ڈار دا اپنے ہم منصب فیلکس پلاسینسیا نوں فون، دوطرفہ تعلقات تے گل بات؛ صدر نیشنل پارٹی عبدالمالک بلوچ دی پارلیمانی وفد نال وزیرِ خارجہ نال ملاقات

اسلام آباد

نائب وزیرِ اعظم تے وزیرِ خارجہ سینیٹر محمد اسحاق ڈار نے وینزویلا دے نویں وزیر برائے خارجہ تعلقات تے بین الاقوامی تجارت فیلکس پلاسینسیا نال ٹیلی فون تے رابطہ کیتا، جس وچ دوطرفہ تعلقات، تجارت، سرمایہ کاری، زراعت، انفارمیشن ٹیکنالوجی تے ہور شعبیاں وچ تعاون نوں ودھان تے اتفاق کیتا گیا۔ اسحاق ڈار نے فیلکس پلاسینسیا نوں نواں عہدہ سنبھالن تے مبارکباد دتی تے وینزویلا وچ پچھلے دناں آون والے بھچال (زلزلے) پاروں ہون والے جانی تے مالی نقصان تے ڈونگھے دکھ تے تعزیت دا اظہار کردیاں ہویاں متاثرہ لوکاں نال پاکستان دی یکجہتی نوں دہرایا۔ وینزویلا دے وزیرِ خارجہ نے امریکہ تے ایران وچکار کشیدگی گھٹ کرن تے مذاکرات نوں فروغ دین لئی پاکستان دے مثبت سفارتی کردار دی تعریف کیتی۔

دوناں رہنماواں نے پاکستان تے وینزویلا دے پرانے دوستانہ تعلقات نوں ہور مضبوط بنان، تجارت، سرمایہ کاری، کاروبار، زراعت، انفارمیشن ٹیکنالوجی تے ہور شعبیاں وچ تعاون ودھان، اقتصادی رابطیاں نوں تیز کرن، عوامی پدھر تے تعلقات نوں پکا کرن تے نیڑے مستقبل وچ ملاقات کرن تے اتفاق کیتا۔

ایس توں ہٹ کے ترجمان دفترِ خارجہ طاہر اندرابی نے دسیا کہ کینیڈا دی وزیرِ خارجہ انیتا آنند، نائب وزیرِ اعظم اسحاق ڈار دی دعوت تے اج پاکستان دا سرکاری دورہ کرن گیاں۔ دورے دے دوران پاک کینیڈا تعلقات، تجارت، سرمایہ کاری، تعلیم، عوامی رابطیاں، علاقائی تے عالمی معاملیاں سمیت باہمی تعاون دے وکھو وکھ پہلوواں تے تفصیلی گل بات ہوئے گی، جدکہ اوہ پاکستانی قیادت نال وی ملاقات کرن گیاں۔

دوجے پاسے اسحاق ڈار نے نیشنل پارٹی دے صدر ڈاکٹر عبدالمالک بلوچ تے اوہناں دی جماعت دے پارلیمانی وفد نال وی ملاقات کیتی۔ اوہناں نے بلوچستان دے لوکاں دے مسلیاں نوں حل کرن، معاشی و ترقیاتی سداواں نوں پورا کرن تے صوبے دی خوشحالی لئی وفاقی حکومت دے عزم نوں دہرایا۔