ڈگری تصدیق نہ کراؤن اُتے 1133 وکلا دے لائسنس معطل
لاہور (مانیٹرنگ ڈیسک) پنجاب بار کونسل نے لا ڈگریاں دی تصدیق دے معاملے اُتے اپنی تریخ دی وڈی کارروائی کردیاں ہوئیاں ایچ ای سی توں ڈگریاں دی تصدیق نہ کراؤن والے 1133 وکلا دے لائسنس معطل کر دِتے نیں۔
جاری کیتے گئے اعلامیے دے مطابق اے کارروائی چیئرمین ایگزیکٹو کمیٹی فخر حیات اعوان دی منظوری نال کیتی گئی۔ اعلامیے وچ دسیا گیا کہ وکھو وکھ یونیورسٹیاں توں ڈگری لین والے وکلا نوں ایچ ای سی توں تصدیق شدہ ڈگریاں جمع کراؤن لئی نوٹس جاری کیتے گئے سن تے اوہناں نوں 15 جولائی 2026 تیکر دی مہلت وی دتی گئی سی، پر مِتھے ہوئے ویلے دے مُک جانے دے باجوں وی 1133 وکلا چاہیدے کاغذات جمع نہ کرا سکے۔
صرف 29 وکلا نے مِتھے ہوئے ویلے دے اندر ایچ ای سی توں تصدیق شدہ ڈگریاں جمع کرائیاں جدوں کہ 32 کیس لائسنس دی بحالی لئی ایگزیکٹو کمیٹی نوں گھل دتے گئے نیں۔ شاہ عبداللطیف بھٹائی یونیورسٹی نال تعلق رکھن والی جانچ پڑتال دے دوران 128 وکلا نوں آخری موقع دیندیاں ہوئیاں ہدایت کیتی گئی اے کہ اوہ 25 جولائی نوں اصل تعلیمی سنداں، متعلقہ ثبوتاں تے ایچ ای سی توں تصدیق شدہ ڈگری نال پیش ہون۔ انج نہ کرن دی صورت وچ اوہناں دے خلاف قانون دے مطابق اگلی کارروائی، بشمول مقدمے درج کرن ورگی کارروائی ہو سکدی اے۔ شاہ عبداللطیف بھٹائی یونیورسٹی خیرپور توں قانون دی ڈگری رکھن والے ہور 62 وکلا دے لائسنس وی معطل کیتے گئے نیں۔
اعلامیے وچ خبردار کیتا گیا اے کہ جے کوئی وکیل جالی تصدیقی سرٹیفکیٹ یا جالی کاغذات جمع کراؤن دا مجرم پایا گیا تاں اوہدے خلاف سخت قانونی کارروائی کیتی جائے گی۔ ایس قدم دا مقصد وکالت دے شعبے وچ شفافیت، پیشہ ورانہ معیار تے لوکاں دے اعتماد نوں ہور مضبوط بنانا اے۔
