شیخوپورہ: 8 آئل ٹینکر 4 لکھ لٹر ذخیرہ پٹرول سمیت پھڑے گئے

ایف آئی اے، اوگرا نے ماچھیکے آئل ڈپوز دے باہر چھاپہ ماریا، 20 ملزم گرفتار؛ متعلقہ محکمیاں نوں لکھاں دی منتھلی، حکومتی خزانے نوں کروڑاں دے نقصان دا انکشاف

شیخوپورہ (ڈسٹرکٹ رپورٹر) وفاقی تحقیقاتی ادارہ (ایف آئی اے) تے اوگرا دی سانجھی ٹیم نے اک خفیہ ادارے دی دَس اُتے سرگودھا روڈ اُتے ماچھیکے آئل ڈپوز دے باہر ڈبہ سٹیشناں اُتے کامیاب آپریشن کردیاں ہوئیاں، مہنگا ویچن لئی ذخیرہ کیتا گیا 4 لکھ لٹر پٹرول 8 آئل ٹینکراں سمیت اپنے قبضے وچ لے لیا اے تے ایہناں 8 ٹینکراں دے ڈرائیوراں سمیت 20 بندیاں نوں گرفتار کر لیا گیا اے، جدوں کہ ذخیرہ اندوزاں توں وکھ ڈبہ سٹیشناں دے مالکان دے خلاف وی کارروائی کیتی جا رہی اے۔

ذرائع نے دسیا اے کہ ایف آئی اے تے اوگرا دی ٹیم نوں رپورٹ دتی گئی سی کہ ماچھیکے آئل ڈپوواں دے باہر 100 توں ودھ غیر قانونی سیل پوائنٹس تے ڈبہ سٹیشن چل رہے نیں، جہاں تے سمگل تے چوری شدہ پٹرول تے ڈیزل دا کروڑاں رُپئے دا کاروبار ہوندا اے تے ایہناں ڈبہ سٹیشناں دے مالکان ہر مہینے لکھاں رُپئے متعلقہ محکمیاں نوں منتھلیاں دیندے نیں.

ذرائع نے دسیا اے کہ پٹرول تے ڈیزل دی خرید و فروخت بارے نویں پالیسی پاروں 4 لکھ لٹر پٹرول 8 ٹینکراں وچ ذخیرہ کر کے وکھو وکھ ڈبہ سٹیشناں وچ لُکایا گیا سی تے ایہناں ڈبہ سٹیشناں نوں باہروں تالے لائے ہوئے سن، جہاں تے ایف آئی اے تے اوگرا دی ٹیم نے آپریشن کر کے ایہناں 8 ٹینکراں نوں اپنی تحویل وچ لے لیا۔ ذرائع دا کہنا اے کہ ایہناں وچوں 5 آئل ٹینکر اک ہی تاجر دی ملکیت نیں۔

ایہناں ڈبہ سٹیشناں اُتے روزانہ ہون والے سمگل شدہ تے چوری شدہ پٹرول تے ڈیزل دے کاروبار پاروں وفاقی حکومت نوں ہر مہینے سرکاری ٹیکساں دی مد وچ کروڑاں رُپئے دا نقصان چکنڑاں پے رہا اے۔ اے ڈبہ سٹیشن 7 ورھے پہلے مسمار کر دتے گئے سن، پر بعد وچ سکیورٹی دے حوالے توں انتہائی خطرناک رپورٹاں دے باوجود فیر توں چل رہے نیں۔