وادی کالام دی فلک سیر چوٹی اُتے حادثہ، کوہ پیما علی شاہ جاں بحق
سوات (این این آئی) وادی کالام دی سطح سمندر توں تقریباً 19 ہزار 400 فٹ اچی فلک سیر (کے ٹو-2) چوٹی اُتے پیش آنے والے افسوسناک حادثے وچ خوازہ خیلہ دے مقامی کوہ پیما علی شاہ جاں بحق ہو گئے، جدوں کہ راولپنڈی نال تعلق رکھن والے 3 کوہ پیما زخمی ہو گئے۔
شدید برفانی طوفان، اوکھے رستیاں تے مواصلاتی نظام نہ ہون پاروں واقعے دی اطلاع کئی دناں بعد ضلعی انتظامیہ تے ریسکیو اداریاں تیکر پہنچی۔ پولیس دے مطابق عباس سکنہ لوندخوڑ مردان نے چوکی مٹلتان وچ درج بیان وچ دسیا کہ اوہ رحیم سکنہ مدین، ہارون، حارث ظفر سکنہ راولپنڈی، عبد الستار خان سکنہ سمبٹ مٹہ تے علی شاہ سکنہ وچ خوڑ خوازہ خیلہ دے نال 5 جولائی نوں فلک سیر چوٹی سر کرن لئی روانہ ہوئے سن۔
10 جولائی نوں چوٹی اُتے پہنچے تے اک رات رہن دے بعد 11 جولائی نوں واپسی اُتے اچانک شدید برفانی طوفان دی لپیٹ وچ آ گئے۔ ایس دوران بچاؤ والی رسی ٹٹن پاروں علی شاہ ڈونگھی کھائی وچ جا ڈگے۔ ساتھی کوہ پیمانواں نے لبھن توں بعد اوہناں نوں شدید زخمی حالت وچ لبھ لیا، پر بوہتی ٹھنڈ، شدید زخمی ہون تے ویلے سِر طبی امداد نہ ملن پاروں اوہ 12 جولائی دی سویر دم توڑ گئے۔
ایس دوران ہارون دی طبیعت وی بہت خراب ہو گئی، جدوں کہ انتہائی اوکھے تے برف نال ڈھکے علاقے پاروں علی شاہ دی لاش نوں تھلے منتقل نہ کر سکے، جیہڑی ہجے تیکر جائے وقوعہ اُتے ہی موجود اے۔
ریسکیو 1122 سوات دے مطابق مٹلتان دے پہاڑی علاقے وچ پیش آن والے ایس واقعے وچ 7 کوہ پیما متاثر ہوئے، جنہاں وچوں 3 زخمی ہوئے؛ زخمی ہون والیاں وچ خاور (40 سال)، حارث (22 سال) تے ہارون (27 سال) ساکنان راولپنڈی شامل نیں، جنہاں نوں تحصیل ہیڈکوارٹرز ہسپتال کالام وچ مڈھلی طبی امداد دین توں بعد اگلیے علاج لئی سنٹرل ہسپتال سیدو شریف منتقل کر دتا گیا اے۔ دوجے 3 کوہ پیما محفوظ نیں تے ضلعی انتظامیہ دے نال علی شاہ دی لاش کڈھن لئی موقعے اُتے موجود نیں۔
ضلعی انتظامیہ دی مڈھلی رپورٹ دے مطابق حادثہ انتہائی اوکھے، برف نال ڈھکے تے اِچے پہاڑی تھاں اُتے پیش آیا، جتھے زمینی رستے توں ریسکیو آپریشن تے لاش دی منتقلی تقریباً ناممکن اے، ایس لئی متعلقہ حکام نوں ہیلی کاپٹر فراہم کرن دی سفارش کیتی گئی اے تاں جے لاش نوں محفوظ طریقے نال تھلے لیایا جا سکے۔ اطلاع ویلے سِر نہ ملن دی وڈی وجہ فلک سیر چوٹی دے علاقے وچ موبائل سگنل یا مواصلاتی نظام دا نہ ہونا سی، جدوں کہ پولیس، ضلعی انتظامیہ، ریسکیو 1122 تے دوجے متعلقہ ادارے ریسکیو تے ریکوری آپریشن لئی رابطے وچ نیں۔
