نان بائیاں دا روٹی 9 تے نان 10 رُپئے مہنگا کرن دا اعلان
لاہور (مانیٹرنگ ڈیسک) نان بائیاں نے آپے ہی روٹی 9 رُپئے تے نان دی قیمت وچ 10 رُپئے اضافے دا اعلان کر دتا اے، جس توں بعد روٹی 25 جدوں کہ نان 35 رُپئے دا ہو گیا اے۔
نان بائی ایسوسی ایشن دے مطابق آٹے دا بھاء ودھن پاروں پرانے نرخ اُتے روٹی تے نان ویچنا ممکن نہیں، آٹے دیاں ودھدیاں قیمتاں نے قیمت ودھاؤن اُتے مجبور کیتا اے۔ اوہناں نے ہور آکھیا کہ 20 کلو آٹے دا تھیلا 2400 رُپئے تیکر پہنچ چکیا اے ایس لئی پرانی قیمت اُتے فروخت ممکن نہیں، جے حکومت نے نویاں قیمتاں تسلیم نہ کیتیاں تاں تندور بند کر دیاں گے۔
دوجے پاسے شہریاں دا کہنا اے کہ دو ویلے دی روٹی لبھنا وی اوکھا ہو چکیا اے، آئے دن ودھدی مہنگائی نے گھریلو بجٹ تباہ کر دتا اے، تنخواہاں اوہی نیں پر روزمرہ دیاں لوڑی دیاں شے واں لگاتار مہنگیاں ہو رہیاں نیں۔ مہنگائی پاروں چٹی پوش (سفید پوش) طبقے لئی گھر دا خرچہ چلانا اوکھا ہو گیا اے، حکومت آٹے دی قیمت وچ کمی لیا کے روٹی تے نان سستا کرائے۔
