وادی نیلم وچ کلاؤڈ برسٹ؛ سیلابی ریلے نے تباہی مچا دتی
اسلام آباد، لاہور آزاد کشمیر دی نیلم ویلی وچ کلاؤڈ برسٹ (بدل پھٹن) توں سیلابی ریلے نے وڈے پدھر اُتے تباہی مچا دتی۔ دوجے پاسے بالاکوٹ دے اتلے علاقیاں وچ تیز مینہہ پاروں برساتی نالیاں وچ اچانک ہڑھ آ گیا تے لینڈ سلائیڈنگ نال ٹریفک متاثر ہوئی، کئی گاڑیاں نالیاں نال پھس گئیاں۔
نیلم دے علاقے کٹھہ پیراں تے لڑی مینگل وچ کلاؤڈ برسٹ توں شدید سیلابی ریلے نے تباہی مچا دتی۔ اچانک ہڑھ آؤن پاروں 50 توں ودھ دکاناں، کئی مکان، 4 گاڑیاں، کئی موٹر سائیکل، درجنوں ڈنگر (مویشی) تے قیمتی سامان پانی دے تیز وہاء وچ روڑھ گئے۔ کٹھہ پیراں نالے وچ تگڑے ہڑھ پاروں کئی پل وی تباہ ہو گئے، جس نال پنڈ دا دوجے علاقیاں توں زمینی رابطہ ٹٹ گیا۔ سیلابی ریلے نے پھلدار رُکھاں، فصلاں تے دوجے مال اسباب نوں وی بھاری نقصان پہنچایا، جدوں کہ بجلی دے کھمبے ڈگن نال بجلی بند ہو گئی۔ سیلابی ریلا دن ویلے آؤن پاروں کوئی جانی نقصان نہیں ہویا۔ مقامی انتظامیہ نے نقصاناں دا صحیح اندازہ لاؤن تے امدادی کماں لئی متاثرہ علاقے دا دورہ کیتا، جدوں کہ مقامی بندیاں تے تاجروں دا کہنا اے کہ سیلاب پاروں کروڑوں دا نقصان ہویا اے۔ اوہناں نے حکومت توں ترت مالی امداد تے بحالی دے اقدامات دا مطالبہ کیتا اے۔
دوجے پاسے بالاکوٹ دے اتلے علاقیاں وچ تیز مینہہ پاروں ڈمگلہ، شوال تے بولی دے برساتی نالیاں وچ اچانک ہڑھ آ گیا تے لینڈ سلائیڈنگ پاروں کئی تھانواں اُتے ٹریفک دی روانی متاثر ہون نال کئی گاڑیاں نالیاں دے نیڑے پھس گئیاں۔ ریسکیو ٹیماں نے ویلے سِر کارروائی کر کے پھسے ہوئے مقامی لوکاں تے سیرو سپاٹے لئی آئے سیاحاں نوں بحفاظت کڈھیا تے گاڑیاں نوں محفوظ تھانواں اُتے پہنچایا۔
این ڈی ایم اے نے اج توں 23 جولائی تیکر شدید مونسون مینہہ، دریاواں وچ ہڑھ تے اربن فلڈنگ (شہری سیلاب) دا الرٹ جاری کر دتا اے۔ این ڈی ایم اے دے مطابق پچھمی ہواواں دا تکڑا سلسلہ 20 توں 23 جولائی تک گلگت بلتستان، خیبر پختونخوا، آزاد کشمیر تے اتلے پنجاب وچ مسلا دھار مینہہ دا کارن بنے گا۔ دریائے چناب وچ مرالہ تے دریائے جہلم دے منگلا دے اتلے حصے وچ سیلابی ریلیاں دا امکان اے، جدوں کہ دریائے کابل تے اوہدے معاون دریاواں، خاص کر پنجکوڑہ، سوات تے چترال وچ بھی ہڑھ دا خطرہ اے۔
سیالکوٹ، نارووال، گجرات، مریدکے، ڈی جی خان، راجن پور، مری، گلیات، لوئر چترال، اپر و لوئر دیر، مالاکنڈ، شانگلہ، کوہستان، مانسہرہ، ایبٹ آباد، ہری پور، گلگت بلتستان، آزاد کشمیر، راولپنڈی، اسلام آباد، پشاور، گوجرانوالہ، حافظ آباد، لاہور تے شیخوپورہ سمیت نکے (نشیبی) علاقیاں وچ اربن فلڈنگ دا خطرہ اے۔ پی ڈی ایم اے نے وی 20 توں 24 جولائی دے دوران دریائے چناب، جہلم، راوی تے نال لگدے ندی نالیاں وچ سیلاب دی وارننگ جاری کر دتی اے۔ صوبے بھر دے کمشنراں تے ڈپٹی کمشنراں نوں الرٹ جاری کر دتا گیا اے۔ محکمہ موسمیات نے وی چتاونی دتی اے کہ اج توں بدھ تیکر ملک دے اتلے علاقیاں وچ پین والے بھاری مینہہ پاروں لینڈ سلائیڈنگ دا ڈر اے۔
