انتخابات شیڈول دے مطابق ہون گے: چیف الیکشن کمشنر آزاد کشمیر
مظفرآباد، اسلام آباد (بیورو رپورٹ، مانیٹرنگ ڈیسک) چیف الیکشن کمشنر آزاد جموں و کشمیر جسٹس ریٹائرڈ غلام مصطفیٰ مغل نے صاف کر دتا اے کہ آزاد کشمیر وچ عام چونا (انتخابات) مِتھے ہوئے شیڈول دے مطابق ویلے سِر کرائے جان گے۔
چونا پچھے پاؤن (ملتوی کرن) بارے چلدیاں خبراں بالکل جھوٹیاں نیں؛ اک بیان وچ اوہناں نے عوام نوں اپیل کیتی کہ چونا لٹکن دیاں افواہواں تے فیک نیوز اُتے دھیان نہ دتا جائے۔ اوہناں دا کہنا سی کہ ملازمین لئی پولنگ 20 جولائی نوں مِتھے ہوئے پروگرام دے مطابق ہوئے گی، جس لئی سارے ضروری انتظام پورے کر لئے گئے نیں۔
چیف الیکشن کمشنر دے مطابق مہاجرین جموں و کشمیر دے حلقیاں سمیت سارے ریٹرننگ افسراں تیکر پولنگ دا سامان پہنچا دتا گیا اے، چوناں دے دوران پاک فوج، رینجرز تے دوجے قانون لاگو کرن والے اداریاں دے اہلکار سکیورٹی دے فرائض نبھاؤن گے۔ عام چوناں دے پہلے مرحلے دا مُڈھ اج توں بجھ رہا اے، جس دے تحت انتخابی ڈیوٹی اُتے لگے سرکاری ملازم اپنے اپنے حلقیاں دے امیدواراں دے حق وچ ووٹ پاؤن گے۔
الیکشن کمیشن دے مطابق پورے آزاد کشمیر وچ انتخابی ڈیوٹی کرن والے 30 ہزار توں ودھ سرکاری ملازم پوسٹل بیلٹ راہیں اپنا ووٹ پاؤن گے۔ ایس کم لئی سارے ضلعیاں وچ ریٹرننگ افسراں دے دفتراں تے ضلعی ہیڈ کوارٹراں اُتے خاص پولنگ سینٹر بنائے گئے نیں، جہاں مِتھے ہوئے ویلے دے دوران ووٹنگ دا عمل چلدا رہے گا۔
دوجے پاسے عام چوناں دے موقعے اُتے سرکاری ملازماں نوں ووٹ پاؤن وچ سوکھ فراہم کرن لئی ڈسٹرکٹ مجسٹریٹ کوٹلی نے پیر دے دہاڑے پورے ضلعے وچ عام چھٹی دی منظوری دے دتی اے، ایسے طرحاں آزاد کشمیر دے دوجے ضلعیاں وچ وی انتخابی ڈیوٹی اُتے مامور سرکاری ملازم اپنے اپنے ضلعی ہیڈ کوارٹراں یا ریٹرننگ افسراں دے دفتراں وچ قائم سینٹراں اُتے ووٹ پاؤن گے۔
