بالاکوٹ: سیاحاں دی گڈی کھائی وچ جاڈھی، 4 جنے جاں بحق

مانسہرہ، سیالکوٹ (اے پی پی، نمائندہ دنیا) بالاکوٹ وچ سیاحاں دی گڈی نوں حادثہ پیش آؤن پاروں 2 سوانیاں (خواتین) سمیت 4 جنے جاں بحق تے اک زخمی ہو گیا۔

ریسکیو 1122 مانسہرہ دے ترجمان مطابق تحصیل بالاکوٹ دے علاقے کیوائی دے نیڑے ڈمناریاں دے مقام اُتے سیالکوٹ توں آؤن والے سیاحاں دی گڈی بے قابو ہو کے ڈونگھی (گہری) کھائی وچ جاڈھی (جا گری)۔ واقعے دی اِطلاع ملدیاں ہی ریسکیو 1122 مانسہرہ دے کنٹرول روم نے ترت پھرت ریسکیو ایمبولینس حادثے والی تھاں ول ٹور دتی۔

جاں بحق ہون والیاں وچ شہروز، ڈرائیور جنید تے دو سوانیاں شامل نیں، جد کہ زخمی دی پچھان تنویر دے ناں توں ہوئی اے۔ ریسکیو اہلکاراں نے فوراً کارروائی کردیاں زخمی بندے نوں مُڈھلی طبی امداد فراہم کرن لئی کیوائی ہسپتال منتقل کیتا۔ بعد وچ زخمی نوں اگیرے علاج لئی تے جاں بحق ہون والیاں دیاں لاشاں نوں قانونی کارروائی لئی تحصیل ہیڈکوارٹرز ہسپتال بالاکوٹ منتقل کر دتا گیا۔