کینیڈین وزیر خارجہ دیاں شہباز شریف، فیلڈ مارشل، ڈار تے نقوی نال ملاقاتاں پاکستان تے کینیڈا دا تجارت، سرمایہ کاری تے سکیورٹی تعاون ودھاؤن تے اتفاق

کینولا دی درآمد بارے معاہدے تے دستخط، ساڑھے 4 کروڑ ڈالر دے 3 ترقیاتی منصوبیاں دا اعلان، غیر قانونی امیگریشن، انسانی سمگلنگ، سائبر کرائمز دی روکتھام تے گل بات؛ کینیڈین ہم منصب نال جلد ملاقات دا منتظر آں: وزیراعظم؛ سکیورٹی چیلنجز نال نبڑن لئی مشترکہ کوشساں ضروری: عاصم منیر؛ معاہدہ کینیڈین سرمایہ کاراں دا اعتماد ودھائے گا: انیتا آنند

اسلام آباد (نامہ نگار، وقائع نگار، مانیٹرنگ ڈیسک): کینیڈا دی وزیر خارجہ انیتا آنند نے دورہ پاکستان دوران وزیراعظم شہباز شریف، فیلڈ مارشل عاصم منیر، وزیرخارجہ اسحاق ڈار تے وزیر داخلہ محسن نقوی نال ملاقاتاں کیتیاں، ایس موقعے تے پاکستان تے کینیڈا نے تجارت، سرمایہ کاری، سکیورٹی تے ترقیاتی شعبیاں ‘چ تعاون ودھاؤن تے اتفاق کیتا۔ وزیراعظم نال خوشگوار ماحول ‘چ ہون والی ملاقات ‘چ شہباز شریف نے کینیڈین وزیر خارجہ نوں خوش آمدید کہندے ہوئے کہیا کہ دوناں ملکاں وچالے دوستانہ تعلقات قائم نیں جنہاں نوں خاص طور تے تجارت، سرمایہ کاری، زراعت بشمول ایگری فوڈز تے ویکسین دی تیاری، قابل تجدید توانائی، آٹو موبائل تے آٹو پارٹس دی صنعت دے شعبیاں ‘چ مزید وسعت دین دی لوڑ اے۔ اوہناں کہیا کہ اوہ کینیڈا دے وزیر اعظم مارک کارنی نال جلد ملاقات دے منتظر نیں، اوہناں نے خطے ‘چ امن دیاں کوشساں لئی پاکستان دی حمایت کرن تے کینیڈا دا شکریہ ادا کیتا۔

کینیڈین وزیر خارجہ نے زراعت، معدنیات، توانائی توں علاوہ آٹو تے آٹو پارٹس دی صنعت دے شعبیاں ‘چ تجارت تے تعاون دے نویں موقعے لبھن دی اپنی حکومت دی دلی خواہش دا اظہار کردے ہوئے کہیا کہ “فارن انویسٹمنٹ پروموشن اینڈ پروٹیکشن ایگریمنٹ” پاکستان ‘چ کینیڈین سرمایہ کاراں دے اعتماد نوں ودھاؤن تے سرمایہ کاری ‘چ اضافے لئی اہم ثابت ہووے گا۔ دوناں آگوواں نے ایس بات تے وی اتفاق کیتا کہ کینیڈا ‘چ وسدے پاکستانی برادری دوناں ملکاں وچالے اک مضبوط پل دا کردار ادا کر رہی اے۔ دوناں آگوواں نے تجارت تے معدنیات دے شعبیاں ‘چ وفداں دے تبادلے تے وی اتفاق کیتا، تاکہ باہمی فائدے دے موقعے لبھے جا سکن تے دوطرفہ تجارت و سرمایہ کاری دے امکانات نوں مزید فروغ دتا جا سکے۔ ملاقات توں بعد وزیر اعظم نے کینیڈا توں پاکستان نوں کینولا دی درآمد دے حوالے نال “فائٹو سینیٹری” ضوابط دے پروٹوکول تے دستخط دی تقریب دا نظارہ کیتا۔ ایس پروٹوکول تے نائب وزیر اعظم اسحاق ڈار تے کینیڈا دی وزیر خارجہ انیتا آنند نے اپنے اپنے ملکاں دی نمائندگی کردے ہوئے دستخط کیتے۔

کینیڈین وزیر خارجہ نے جی ایچ کیو راولپنڈی ‘چ چیف آف ڈیفنس فورسز فیلڈ مارشل عاصم منیر نال ملاقات کیتی۔ آئی ایس پی آر موجب ملاقات دوران باہمی دلچسپی دے معاملیاں، علاقائی سلامتی تے پاکستان و کینیڈا وچالے دوطرفہ تعلقات تے تفصیلی گل بات ہوئی۔ فیلڈ مارشل نے عالمی امن تے علاقائی استحکام دے حوالے نال پاکستان دے موقف توں آگاہ کردے ہوئے ایس گل تے زور دتا کہ مشترکہ سکیورٹی چیلنجز نال نبڑن لئی باہمی تعاون تے مشترکہ کوشساں ناگزیر نیں۔ انیتا آنند نے دہشت گردی خلاف جنگ ‘چ پاکستان دیاں مسلسل کوشساں تے قربانیاں نوں سراہندے ہوئے خطے ‘چ امن و استحکام دے فروغ لئی پاکستان دے تعمیری کردار دی وی تعریف کیتی۔ ملاقات ‘چ دوناں فریقاں نے پاکستان تے کینیڈا وچالے دوطرفہ تعلقات نوں مزید مضبوط بنان تے دفاعی و سکیورٹی شعبیاں ‘چ تعاون تے رابطیاں نوں وسعت دین دے عزم دا اعادہ کیتا۔

ایہدے توں پہلے کینیڈین وزیر خارجہ نے نائب وزیراعظم اسحاق ڈار نال ملاقات کیتی، وفداں دی سطح تے وی مذاکرات ہوئے۔ ایس موقعے تے فیصلہ کیتا گیا کہ دوناں ملکاں وچالے جاری تعاون تے مشترکہ اعلامیے تے ہون والی پیش رفت دا جائزہ لین لئی سالانہ بنیاداں تے اعلیٰ سطح اجلاس کیتے جان گے، تاکہ طے شدہ ہدفاں تے مؤثر عملدرآمد نوں یقینی بنایا جا سکے۔ انیتا آنند نے اعلان کیتا کہ کینیڈا پاکستان لئی ساڑھے 4 کروڑ ڈالر مالیت دے 3 نویں ترقیاتی منصوبے شروع کرے گا، جنہاں دا مقصد پائیدار ترقی، موسمیاتی لچک تے مقامی کمیونٹیز دی بہتری نوں فروغ دینا اے۔ مشترکہ پریس کانفرنس نال خطاب کردے ہوئے اسحاق ڈار نے کہیا کہ صلاحیت سازی دے شعبے ‘چ تعاون نوں مزید وسعت دتی جاوے گی۔ انیتا آنند نے کہیا کہ تجارت، سرمایہ کاری تے اقتصادی تعاون دے فروغ دے وسیع موقعے موجود نیں، پاکستان کینیڈا دی تجارتی تنوع دی حکمت عملی ‘چ اہم شراکت دار اے۔

پاکستان نال شراکت داری نوں مزید مستحکم بنان تے اتفاق ہوا، مشرق وسطیٰ ‘چ پائیدار امن لئی پاکستان دیاں سفارتی کوشساں تعریف دے قابل نیں، علاقائی کشیدگی دے حل لئی گل بات تے سفارت کاری دی حمایت کرنے آں، سارے فریقاں نوں حوصلہ، برادشت تے شہریوں دے تحفظ نوں ترجیح دینی چاہی دی اے۔ اوہناں کہیا کہ کینیڈا تے پاکستان وچالے سرمایہ کاری دے تحفظ دے نویں معاہدے نوں جلد مکمل کیتا جاوے گا۔ اوہناں اعلان کیتا کہ کینیڈا پاکستان لئی 22 لکھ ڈالر توں ودھ مالیت دے نویں سکیورٹی اقدامات متعارف کرا رہا اے، جنہاں تے انٹرپول، اقوام متحدہ تے دوجے شراکت دار اداریاں نال مل کے عملدرآمد کیتا جاوے گا۔ انیتا آنند نے وزارت داخلہ دا وی دورہ کیتا جتھے وفاقی وزیر داخلہ محسن نقوی نال تفصیلی ملاقات ہوئی، ایس دوران پاک کینیڈا تعلقات، تجارت، سکیورٹی تے باہمی رابطے ودھاؤن سمیت خطے دی تازہ ترین صورتحال تے تبادلہ خیال کیتا گیا۔

ایس موقعے تے غیر قانونی امیگریشن، انسانی سمگلنگ تے سائبر کرائمز دی روکتھام لئی مشترکہ اقدامات تے قانون نافذ کرنے والے اداریاں دے افسراں لئی ٹریننگ و ایکسچینج پروگرام شروع کرنے تے تفصیلی گل بات ہوئی۔ دوناں وزراء نے دوطرفہ تعاون نوں مزید مستحکم تے فعال بنان لئی اک سمجھوتے (ایم او یو) تے جلد دستخط کرنے تے اتفاق کیتا۔ محسن نقوی نے کہیا کہ پاکستان کینیڈا نال سارے شعبیاں ‘چ اپنے تعلقات نوں فروغ دینا چاہندا اے۔ وزیر مملکت طلال چوہدری نے کہیا کہ کینیڈا نال مشترکہ مفادات دے شعبیاں ‘چ اشتراک ودھاؤن دے معاہدے توں دوطرفہ تعلقات نوں نئی جلا ملے گی۔ کینیڈین وزیر خارجہ انیتا آنند نے پاکستان نال اپنے ملک دے تعلقات نوں انتہائی اہمیت دا حامل قرار دیندے ہوئے کہیا کہ کینیڈا پاکستان نال دوطرفہ تعلقات نوں مزید وسعت دین دا خواہاں اے تے ایس باہمی تعاون نوں مزید منظم کرنے لئی اک جامع فریم ورک مرتب کیتا جانا چاہی دا اے۔

بعد ‘چ کینیڈین وزیرخارجہ دی پاکستان ‘چ ملاقاتاں دا اعلامیہ جاری کر دتا گیا، جس ‘چ دوطرفہ رابطیاں ‘چ نئی پیش رفت دا خیرمقدم کردے ہوئے تجارت، سرمایہ کاری تے عوامی رابطیاں دے فروغ راہیں تعلقات نوں مزید مضبوط بنان دے عزم دا اظہار کیتا گیا، وزیر خارجہ دا عہدہ سنبھالن توں بعد انیتا آنند دا ایہ پاکستان دا پہلا دورہ سی۔ مشترکہ اعلامیہ ‘چ دوناں ملکاں نے اقتصادی، تعلیمی تے ادارہ جاتی رابطیاں دے فروغ، پائیدار جنگ بندی دی لوڑ تے اسلام آباد سمجھوتے تحت کیتے گئے وعدیاں تے عملدرآمد دی اہمیت تے زور دتا۔ پاکستان کینیڈا مشترکہ ورکنگ گروپ برائے تجارت و سرمایہ کاری نوں مڑ فعال کرنے تے وی اتفاق کیتا گیا۔

پاکستان تے کینیڈا نے غیر ملکی سرمایہ کاری دے تحفظ و فروغ دے معاہدے (ایف آئی پی اے) تے ہون والی پیش رفت دا خیرمقدم کیتا تے مذاکرات جلد مکمل کرنے لئی باقاعدہ رابطے جاری رکھن تے زور دتا۔ ایس گل دا وی خیرمقدم کیتا گیا کہ کینیڈین کمپنی جے سی ایم پاور دی 240 میگاواٹ دھابیجی ہائبرڈ ونڈ سولر منصوبے لئی کامیاب بولی، جو کے الیکٹرک دے اشتراک نال اے، نوں ساریاں ضروری ریگولیٹری منظوری مل چکی اے۔ ایہ اہم سرمایہ کاری پاکستان ‘چ قابلِ تجدید توانائی دی فراہمی ‘چ نمایاں کردار ادا کرے گی۔ ایہدے توں علاوہ زرعی خوراک دی ویلیو چین، زرعی ٹیکنالوجی، غذائی تحفظ، حفظانِ صحت تے نباتاتی صحت دے معیاراں و ضوابط تے تعاون ودھاؤن تے زور دتا گیا۔