جوڈیشل کمیشن : اسلام آباد، پشاور تے سندھ ہائیکورٹ ‘چ 10 ایڈیشنل ججاں دے تقرر تے مستقلی دیاں سفارشاں منظور
شاہ رخ ارجمند، ایاز شوکت، عمیر مجید اسلام آباد ہائیکورٹ؛ محمد ہمایوں، سریش کمار، ڈاکٹر شاہ نواز نوں سندھ ہائیکورٹ دا ایڈیشنل جج مقرر کرنے دی منظوری؛ جسٹس مس فرح جمشید، جسٹس انعام اللہ، جسٹس ثابت اللہ، جسٹس اورنگزیب نوں پشاور ہائیکورٹ دے مستقل جج؛ سندھ ہائیکورٹ آئینی بینچاں دی مدت ‘چ توسیع؛ جسٹس فیاض الحسن دی مستقلی دی منظوری نہیں دتی: چیف جسٹس دی صدارت ‘چ اجلاس؛ لا اینڈ جسٹس کمیشن دی انٹرنیشنل کمرشل کورٹ دے قیام لئی آئینی ترمیم دی تجویز
اسلام آباد (کورٹ رپورٹر): چیف جسٹس پاکستان جسٹس یحییٰ آفریدی دی صدارت ‘چ جوڈیشل کمیشن نے اسلام آباد ہائی کورٹ، سندھ ہائی کورٹ تے پشاور ہائی کورٹ نال تعلق رکھدے اجلاس ‘چ ایڈیشنل ججاں دی تقرری، مستقل کرنے، مدتِ ملازمت ‘چ توسیع تے آئینی بینچاں دی مدت ودھاؤن دیاں اہم سفارشاں منظور کر لئیاں۔ جاری اعلامیے موجب سپریم کورٹ ‘چ ہون والے اجلاس ‘چ سندھ ہائی کورٹ، اسلام آباد ہائی کورٹ تے پشاور ہائی کورٹ نال متعلق مختلف ایجنڈا آئٹماں تے غور کیتا گیا۔ سندھ ہائی کورٹ دے حوالے نال کمیشن نے اکثریتی رائے نال جسٹس خالد حسین شاہانی دی بطور ایڈیشنل جج مدتِ ملازمت ‘چ مزید 6 ماہ توسیع دی سفارش کیتی، جد کہ جسٹس سید فیاض الحسن شاہ نوں مستقل جج بنان دی منظوری نہیں دتی گئی۔
کمیشن نے سندھ ہائی کورٹ دے آئینی بینچاں دی مدت ‘چ وی مزید 3 ماہ دی توسیع دی منظوری دتی۔ سندھ ہائی کورٹ ‘چ ایڈیشنل ججاں دی تقرری لئی کمیشن نے اکثریتی رائے نال محمد ہمایوں خان ایڈووکیٹ، ڈسٹرکٹ اینڈ سیشن جج سریش کمار تے ڈاکٹر شاہ نواز میمن ایڈووکیٹ دی منظوری دتی۔ اعلامیے موجب دو اسامیاں مطلوبہ اکثریت نہ ملن پاروں پُر نہ کیتیاں جا سکیاں۔ اسلام آباد ہائی کورٹ لئی کمیشن نے ایاز شوکت ایڈووکیٹ، ڈسٹرکٹ اینڈ سیشن جج شاہ رخ ارجمند تے عمیر مجید ملک ایڈووکیٹ نوں بطور ایڈیشنل جج تعینات کرنے دی منظوری دتی۔ پشاور ہائی کورٹ دے حوالے نال کمیشن نے اکثریتی رائے نال چار ایڈیشنل ججاں نوں مستقل جج بنان دی منظوری دتی، جنہاں ‘چ جسٹس مس فرح جمشید، جسٹس انعام اللہ خان، جسٹس ثابت اللہ خان تے جسٹس اورنگزیب شامل نیں۔
کمیشن نے ایہ سفارش متعلقہ ریکارڈ، کوائف، پرانی معلومات تے دستیاب مواد دا جائزہ لین توں بعد کیتی۔ ایس دوران چیف جسٹس پاکستان یحییٰ آفریدی دی صدارت ‘چ لا اینڈ جسٹس کمیشن دے 49ویں اجلاس ‘چ انٹرنیشنل کمرشل کورٹ آف پاکستان دے قیام لئی آئین ‘چ نواں آرٹیکل 212-اے شامل کرنے دی سفارش کردے ہوئے آئینی ترمیم دی تجویز وفاقی حکومت نوں قانون سازی لئی گھلن دا فیصلہ کیتا گیا۔ سپریم کورٹ دے اعلامیے موجب اجلاس ‘چ فیصلہ کیتا گیا کہ انٹرنیشنل کمرشل کورٹ آف پاکستان دے قیام لئی آئین ‘چ نویں آرٹیکل 212-اے دا وادھا تجویز کیتا جاوے۔ ایہ اک آزاد وفاقی اعلیٰ عدالت ہووے گی جو بین الاقوامی تجارتی جھیڑیاں (تنازعیاں) دے فوری، مؤثر تے شفاف حل لئی قائم کیتی جاوے گی۔ ایہ عدالت ثالثی ایوارڈز دے مؤثر نفاذ، تجارتی قانوناں ‘چ یکسانیت، سرمایہ کاراں دے اعتماد ‘چ اضافے تے پاکستان نوں بین الاقوامی تجارت و سرمایہ کاری لئی مزید پرکشش بنان ‘چ مددگار ثابت ہووے گی۔
