گیس گردشی قرضہ سیٹلمنٹ پلان تے آئی ایم ایف دیاں نویاں شرائط، منظوری ملتوی

گیس کمینیاں دی نان ریکوری نوں نقصان قرار دے کے ری کیپٹلائز کرنے دی شرط عائد، پٹرولیم ڈویژن نے تحفظات ظاہر کر دتے؛ گیس سیکٹر دا گردشی قرضہ 3 ہزار 300 ارب روپے ہو گیا، 6 ورھیاں ‘چ اک ہزار 700 ارب روپے سیٹل کرنے دا منصوبہ تیار؛ پٹرولیم لیوی توں 450 ارب، ڈیویڈنڈ 700، ایل این جی بچت توں 500 ارب حاصل کرنے دا پلان ستمبر ‘چ پیش کیتا جاوے گا

اسلام آباد (مدثر علی رانا): باوثوق ذرائع توں معلوم ہویا اے کہ آئی ایم ایف نے گیس سیکٹر دے گردشی قرضے دی سیٹلمنٹ لئی حکومتی پلان دی منظوری لئی نویاں شرائط دا مطالبہ کیتا اے، جیہدے پاروں موجودہ فریم ورک تحت سیٹلمنٹ پلان دی منظوری نہیں ہو سکی۔ آئی ایم ایف نے مطالبہ کیتا اے کہ گیس کمینیاں دے نقصان نوں بُک کیتا جاوے، کمینیاں نے جو وصولیاں کرنی نیں اوہناں نوں نقصان ڈکلیئر کیتا جاوے تے کمینیاں نوں دوبارہ ری کیپٹلائز کیتا جاوے!

ذرائع نے دَسیا کہ آئی ایم ایف دی ایس شرط تے عملدرآمد کرنے نال دواں گیس کمینیاں دے شیئرز ‘چ گراوٹ ہو سکدی اے جیہدے نال مزید نقصان ہووے گا۔ آئی ایم ایف دیاں ایہہ شرائط پٹرولیم ڈویژن دے حکام منّن لئی تیار نہیں نیں۔ گیس سیکٹر دا گردشی قرضہ 3 ہزار 300 ارب روپے دے نیڑے تیڑے پہنچ چکا اے جیہدے ‘چ پرنسپل اماؤنٹ تے سود دی رقم شامل اے۔

آئی ایم ایف نال ورچوئل گل بات دوران گیس سیکٹر دے گردشی قرضے دے سیٹلمنٹ پلان تے اتفاق نہ ہو سکیا۔ ہن ستمبر دوران گردشی قرضے دے سیٹلمنٹ پلان تے حتمی گل بات ہووے گی۔ گیس سیکٹر دے گردشی قرضے دا بوجھ پٹرولیم مصنوعات ورتن والیاں تے ہووے گا۔ ایس پلان تحت حکومت دی پٹرولیم مصنوعات تے مزید 4 روپے تک لیوی عائد کرنے دی تجویز اے۔

ذرائع نے دَسیا کہ جے آئی ایم ایف نے ایس پلان دی منظوری دتی ہوندی تاں ایہدے تے عملدرآمد شروع ہو جانا سی، جیہدے نال پٹرولیم مصنوعات دیاں قیمتاں ‘چ ہور وادھے دا خدشہ سی۔ ایہہ پلان حکومت نے منظور کیتا ہویا اے، جد کہ آئی ایم ایف توں منظوری ہونا باقی اے۔ پلان تحت آؤندے 6 ورھیاں ‘چ گیس سیکٹر دے گردشی قرضے نوں مکاؤن دا منصوبہ بنایا گیا اے۔

ایس پلان تحت مجموعی طور تے 1 ہزار 700 ارب روپے دے گردشی قرضے دی سیٹلمنٹ کیتی جاوے گی جیہدے ‘چوں 1 ہزار 400 ارب روپے نان ریکوری، یو ایف جی تے ٹیرف ڈیفرنشل توں سیٹل ہون گے، جد کہ 300 ارب روپے ٹیکس تے سود ‘چ شامل کیتے جان گے تے مجموعی طور تے 1 ہزار 700 ارب روپے گردشی قرضے ‘چوں نکل جان گے۔

4 روپے تک فی لٹر پٹرولیم لیوی توں ساڑھے 4 سو ارب روپے حاصل ہون گے۔ ڈیویڈنڈ تے اضافی ٹیرف توں 700 ارب روپے حاصل کرنے دا پلان اے جد کہ ایل این جی کارگوز ‘چ کمی کرکے 500 ارب روپے دی بچت کیتی جاوے گی۔ ایس طرحاں اضافی وصول ہون والی رقم نوں گردشی قرضے لئی ایڈجسٹ کیتا جاوے گا۔

خبر تے مؤقف لین لئی وزارتِ توانائی تے وزارتِ خزانہ دے حکام نال رابطہ کیتا گیا پر خبر فائل کرنے تک گل نہ ہو سکی۔ آئی ایم ایف نال آؤندے اقتصادی جائزہ مذاکرات ستمبر ‘چ ہون گے جِتھے گیس سیکٹر دے گردشی قرضے نوں سیٹل کرنے لئی پلان تے دوبارہ گل ہووے گی تے ہن جو پلان حکومتی ٹیم ولوں تیار کیتا جاوے گا اوہ آئی ایم ایف دیاں تجاویز موجب ہو سکدا اے۔