فیملی مقدمات 6 مہینیاں اندر مکاؤنا لازمی : لاہور ہائیکورٹ دا ماتحت عدلیہ نوں حکم
خلع، حق مہر، نان نفقہ مقدمات ‘چ غیر ضروری تاخیر تے فیصلہ جاری؛ چھ مہینیاں توں زیرِ التوا کیسز دی رپورٹ طلب، فیملی ججز درخاستاں تے فوری سماعت کرکے اوہی دن فیصلہ کرنے دی فعال پالیسی اپنان :جسٹس محسن اختر کیانی
لاہور (کورٹ رپورٹر): لاہور ہائی کورٹ نے خلع، حق مہر، نان نفقہ تے دوجے فیملی مقدمات ‘چ غیر ضروری تاخیر تے تحریری فیصلہ جاری کردیاں ہوئیاں پورے پنجاب دے ڈسٹرکٹ اینڈ سیشن ججز توں 6 مہینیاں توں ودھ عرصے توں زیرِ التوا فیملی مقدمات دی رپورٹ طلب کرنے دی ہدایت کر دتی اے۔
جسٹس محسن اختر کیانی نے 14 صفحیاں تے مشتمل تحریری فیصلہ جاری کردیاں ہوئیاں قرار دتا کہ فیملی قانون تحت مقدمات دا فیصلہ 6 مہینیاں اندر لازمی اے، غیر ضروری التوا انصاف دی فراہمی ‘چ سنگین رکاوٹ تے قانون دے بنیادی مقصد دے خلاف اے۔ میاں بیوی دے تنازعیاں دا فوری حل قانون دا تقاضا اے، فیملی عدالتاں سول پروسیجر کوڈ تے قانونِ شہادت دیاں تکنیکی پیچیدگیاں دیاں پابند نہیں، ایس لئی تکنیکی نکتاں دی بنیاد تے تاخیر نہیں کیتی جا سکدی۔
عدالت نے مقدمے نوں پورے پنجاب لئی ٹیسٹ کیس قرار دیندیاں کہیا کہ مقررہ مدت ‘چ مقدمات دا فیصلہ نہ کرنے والے ججز توں وجہاں طلب کیتیاں جان، زیرِ التوا مقدمات جلد مکاؤن تے غیر ضروری تاریخاں دین دا روایتی طریقہ چھڈن دی وی ہدایت کیتی۔ جسٹس محسن اختر کیانی نے کہیا کہ فیملی ججز درخاستاں تے فوری سماعت کرکے اوہی دن فیصلہ کرنے دی فعال پالیسی اپنان، جد کہ درخاست گزاراں ولوں بار بار التوا تے تاخیری حربے اختیار کرنا افسوسناک اے۔
لاہور ہائیکورٹ نے کیس ‘چ تاخیر کرنے والے سائل دی رٹ پٹیشن خارج کردیاں ہوئیاں متعلقہ فیملی کورٹ نوں 15 دناں اندر روزانہ دی بنیاد تے سماعت مکمل کرکے فیصلہ کرنے، تے رجسٹرار ہائیکورٹ نوں عملدرآمد رپورٹ ڈائریکٹر جنرل ڈسٹرکٹ جوڈیشری راہیں جمع کروان دا حکم دے دتا۔
