ترقیاتی منصوبے مقررہ مدت وچ مکمل کرو: وزیر اعظم
ریلوے لائن ون روہڑی، ملتان سیکشن دی اپ گریڈیشن بارے تجاویز طلب؛ شہباز شریف دی زیر صدارت ریلویز ٹرانسفارمیشن پلان دا جائزہ
اسلام آباد (نامہ نگار): وزیر اعظم شہباز شریف نے کہیا اے کہ پاکستان ریلویز مسافراں تے مال برداری لئی سب توں گھٹ لاگت تے موثر ذریعہ نقل و حمل اے۔ جدید تے موثر ریلوے نظام ملکی معیشت، تجارت تے علاقائی رابطیاں دے فروغ وچ کلیدی کردار ادا کرے گا۔ ایہناں خیالات دا اظہار اوہناں نے پاکستان ریلویز ٹرانسفارمیشن پلان تے پیشرفت دے جائزہ اجلاس دی صدارت کردے ہوئے کیتا۔
وزیر اعظم نے کہیا کہ پاکستان ریلویز دے بنیادی ڈھانچے دی جدید کاری دا پاکستان دے علاقائی تجارت تے لاجسٹکس ہب دے طور تے کردار وچ کلیدی کردار ہووے گا۔ وزیر اعظم نے ریلوے دے ترقیاتی منصوبیاں نوں اعلیٰ معیار تے مقررہ مدت دے اندر مکمل کرن تے مین ریلوے لائن ون دے روہڑی-ملتان سیکشن دی اپ گریڈیشن دے حوالے نال تجاویز پیش کرن دی ہدایت کیتی۔
اجلاس نوں ایم ایل-1 تے ایم ایل-3 اپ گریڈیشن، تھر کول ریلوے کنیکٹیوٹی تے دوجے منصوبیاں دی پیشرفت تے بریفنگ دتی گئی۔ بریفنگ وچ دَسیا گیا کہ ایم ایل-1 دی کراچی-روہڑی سیکشن لئی تفصیلی انجینئرنگ ڈیزائن مکمل کر لیا گیا اے۔ ایم ایل-3 روہڑی-نوکنڈی دی اپ گریڈیشن پی ایس ڈی پی تے برج فنانسنگ دے تحت کیتی جاوے گی۔ تھر کول ریل کنیکٹیوٹی منصوبے دا 112 کلومیٹر لمبا ریلوے ٹریک “تھر کول تا چھور ریلوے سٹیشن” تے 60 فیصد کم ہو چکا اے تے ایہ منصوبہ دسمبر 2026 تک مکمل کر لیا جاوے گا۔
بریفنگ وچ دَسیا گیا کہ وزیر اعظم دی ہدایت تے ریلوے دی اصلاحات لئی بین الاقوامی کنسلٹنٹ دیاں خدمات حاصل کر لئیاں گئیاں نیں۔ ریلوے دے ماتحت سکولاں تے ہسپتالاں دیاں سروسز نوں آؤٹ سورس کیتا جا چکا اے، جدکہ چھ وڈے ریلوے سٹیشناں دی کمرشلائزیشن تے کم دا آغاز کیتا جا رہیا اے۔
ایسے۔۔ دوران، وفاقی وزیرِ منصوبہ بندی احسن اقبال نے شہباز شریف نال وزیر اعظم ہاؤس وچ ملاقات کیتی۔ ملاقات وچ ملک بھر وچ جاری ترقیاتی منصوبیاں تے پبلک سیکٹر ڈویلپمنٹ پروگرام دے تحت منصوبیاں دی پیشرفت تے تفصیلی گل بات کیتی گئی۔ شہباز شریف نے ہدایت کیتی کہ قومی اہمیت دے سارے ترقیاتی منصوبیاں نوں مقررہ مدت دے اندر اعلیٰ معیار نال مکمل کیتا جاوے۔
