ن لیگ ذاتی حملیاں دی بجائے لوکاں دے مسلیاں دا جواب دیوے: پی پی
کشمیری لوکاں دی توہین تے چپّ دھارن والے بلاول نوں یکجہتی دا درس نہ دین: شازیہ مری اگر رانا ثنا اللہ بیان نہ دیندے تاں جوائنٹ ایکشن کمیٹی اینا وڈا احتجاج نہ کردی: نیئر بخاری
اسلام آباد (سٹاف رپورٹر): پاکستان پیپلز پارٹی دی مرکزی ترجمان شازیہ مری تے سیکرٹری جنرل نیئر حسین بخاری نے مسلم لیگ (ن) تے تنقید کردیاں آکھیا کہ آزاد جموں و کشمیر دے لوکاں دے آئینی حقوق تے عوامی مسلیاں دا جواب دین دی بجائے ن لیگ سیاسی بیان بازی تے ذاتی حملیاں دا سہارا لے رہی اے۔ شازیہ مری نے آکھیا کہ چیئرمین پیپلز پارٹی بلاول بھٹو زرداری نے آزاد جموں و کشمیر دے لوکاں دے حقوق، وقار، روزگار تے ترقی دی گل کیتی اے جبکہ مسلم لیگ (ن) جائز سوالاں توں پاسا وٹّ رہی اے۔
اوہناں آکھیا کہ جنہاں نے کشمیری لوکاں دی توہین تے چپّ سادھی، اوہ بلاول بھٹو زرداری نوں قومی یکجہتی دا درس نہیں دے سکدے۔ اوہناں دا کہنا سی کہ مسلم لیگ (ن) نوں لوکاں دے مسلیاں دا جواب دینا چاہیدا اے، ذاتی حملیاں توں پرہیز کرنا چاہیدا اے۔ نیئر حسین بخاری نے آکھیا کہ خواجہ آصف نے کشمیریوں نوں کشمیری منیا ای نہیں، ایس تے وزیرِ اعظم نوں جواب دینا چاہیدا اے۔ اوہناں آکھیا کہ رانا ثناء اللہ دے بیان توں جوائنٹ ایکشن کمیٹی دے ممبر زیادہ ناراض ہوئے تے جے ایہہ بیان نہ دندے تاں احتجاج وی اینا وڈا نہ ہندا۔ اوہناں دا کہنا سی کہ مسلم لیگ (ن) ایہوجہی گفتگو توں گریز کرے جیہدا جواب برداست کرنا اوکھا ہووے، جبکہ آزاد کشمیر دے لوک سیاسی جماعتاں دا فیصلہ اوہناں دی کارکردگی تے عوامی خدمت دی بنیاد تے کرن گے۔
