روزانہ دی بنیاد تے نویاں قیمتاں ، پٹرول 4.93 ، ڈیزل 7.15 روپے لیٹر مہنگا: حکومت نال مذاکرات ناکام ، پٹرول پمپاں دی اج رات توں ہڑتال

پٹرول دی نئی قیمت 320 روپے 73 پیسے ، ڈیزل دی 367 روپے 21 پیسے لیٹر مقرر ، مٹی دا تیل 6 روپے 78 پیسے مہنگا ، اوگرا نے نوٹیفکیشن جاری کر دتا ، مطالبات دی منظوری تک ہڑتال رہے گی: پمپ مالکان ، ریٹیلرز نے فیصلے دی حمایت کر دتی ، ڈیلرز ایسوسی ایشن دا صورتحال تے غور لئی اج کراچی وچ اجلاس طلب۔

اسلام آباد (دنیا نیوز) آئل اینڈ گیس ریگولیٹری اتھارٹی (اوگرا) نے پٹرولیم مصنوعات دیاں قیمتاں وچ اج بدھ لئی اضافہ کر دتا۔ قیمتاں دے روزانہ تعین دا نظام نافذ ہون توں بعد دوجے دن پٹرول دی قیمت وچ 4 روپے 93 پیسے دا اضافہ کیتا گیا جس توں بعد پٹرول دی نئی قیمت 320 روپے 73 پیسے ہو گئی۔ ہائی سپیڈ ڈیزل 7 روپے 15 پیسے لیٹر مہنگا کیتا گیا جس توں بعد اس دی فی لیٹر قیمت 367 روپے 21 پیسے تک جا پہنچی جبکہ مٹی دا تیل 6 روپے 78 پیسے مہنگا ہو گیا تے قیمت 289 روپے 37 پیسے ہو گئی ، نوٹیفکیشن دے مطابق قیمتاں دا اطلاق رات 12 وجے توں 22 جولائی لئی ہووے گا۔

کراچی ، اسلام آباد (کامرس رپورٹر ، مانیٹرنگ ڈیسک) آل پاکستان پٹرول پمپ اونرز ایسوسی ایشن دے پٹرولیم مصنوعات دیاں قیمتاں وچ روزانہ رد و بدل دے معاملے تے حکومت نال مذاکرات ناکام ، اج 22 جولائی دی رات 12 وجے توں ملک بھر وچ غیر معینہ مدت تک پٹرول پمپ بند کرن دا اعلان کر دتا ، ریٹیلرز ایسوسی ایشن نے ہڑتال دی حمایت کر دتی جبکہ دوجے پاسے پاکستان پٹرولیم ڈیلرز ایسوسی ایشن نے صورتحال تے غور لئی اج ایگزیکٹو کمیٹی دا اہم اجلاس کراچی وچ طلب کر لیا۔ تفصیلات دے مطابق آل پاکستان پٹرول پمپ اونرز ایسوسی ایشن دے مطابق وفاقی وزیر پٹرولیم علی پرویز ملک نال مذاکرات وچ پمپ مالکان دے منافع وچ اضافے ، پٹرولیم مصنوعات دیاں قیمتاں دے روزانہ تعین دے نظام سمیت ہور معاملیاں تے اتفاق رائے نہیں ہو سکیا جس پاروں ملک گیر احتجاج دا فیصلہ کیتا گیا۔ ایسوسی ایشن دا مؤقف ہے کہ موجودہ مارجن نال پٹرول پمپ چلانا معاشی طور تے ممکن نہیں رہا ، پٹرولیم مصنوعات دی روزانہ بنیاد تے قیمتاں وچ ردوبدل نال ڈیلرز نوں بھی مالی مشکلات دا سامنا ہے ، حکومت جائز تحفظات دور کردے ہوئے قابلِ قبول تے مثبت فیصلہ کرے۔

آل پاکستان پٹرول پمپ اونرز ایسوسی ایشن دے چیئرمین ہمایوں خان نے گفتگو کردے ہوئے کہیا کہ روزانہ دی بنیاد تے قیمتاں آدھا تیتر تے آدھا بٹیر والی کہانی ہے ، حکومت عوام توں جان چھڈاؤن لئی اوہناں نوں بے وقوف بنا رہی ہے ، اج رات 12 وجے توں ملک گیر ہڑتال دا اعلان کردے ہاں۔ آل پاکستان پٹرول پمپ ایسوسی ایشن دے جنرل سیکرٹری نعمان بٹ نے جاری ویڈیو پیغام وچ کہیا ہے کہ ملک بھر دے سارے پٹرول پمپ مالکان نوں ہدایت کیتی گئی ہے کہ اوہ ہڑتال وچ بھرپور شرکت کردے ہوئے اپنے پٹرول پمپ مکمل طور تے بند رکھن ، جے تک حکومت مطالبات تسلیم نہیں کردی اس ویلے تک ملک گیر ہڑتال ختم نہیں کیتی جائے گی۔ مزید برآں آل پاکستان پٹرولیم ریٹیلرز ایسوسی ایشن دے مرکزی رہنما شعیب خان نے ہڑتال دی حمایت دا باضابطہ اعلان کردے ہوئے کہیا ہے کہ حکومت جائز مطالبات تے مثبت فیصلے کرے ، جے تک مطالبات تسلیم نہیں ہون گے تب تک پمپ بند رہیں گے۔ ادھر پاکستان پٹرولیم ڈیلرز ایسوسی ایشن دی ایگزیکٹو کمیٹی دے طلب کردہ اج دے اہم اجلاس وچ حکومت نال ہون والے مذاکرات ، ڈیلرز دے مطالبات تے اگلی حکمتِ عملی تے غور کیتا جائے گا ، جس توں بعد پریس کانفرنس وچ اہم فیصلیاں توں آگاہ کیتا جائے گا۔

باوثوق ذرائع دا کہنا ہے کہ پٹرولیم ڈیلرز ایسوسی ایشن نے حکومت دے سامنے ترئے بنیادی مطالبات رکھے۔ پہلا مطالبہ ایہہ کہ پٹرولیم ڈیلرز دا موجودہ منافع (پرافٹ مارجن) 8 روپے 64 پیسے فی لیٹر توں ودھا کے 24 روپے فی لیٹر کیتا جائے جو تقریباً دو سال توں زیر التواء ہے۔ دوجے مطالبے وچ آئل مارکیٹنگ کمپنیاں ولوں پٹرول پمپاں تے نافذ کوٹہ سسٹم نوں فوری طور تے ختم کرن دا مطالبہ کیتا گیا۔ ترئیجے مطالبے وچ حکومت توں کہیا گیا ہے کہ پٹرولیم مصنوعات دیاں قیمتاں وچ روزانہ دی بنیاد تے ردوبدل کرن دے بجائے اوہناں نوں ہفتہ وار یا پندرہ روزہ بنیاد تے مقرر کیتا جائے تاکہ مارکیٹ وچ استحکام برقرار رہے تے ڈیلرز نوں مالی نقصان توں بچایا جا سکے۔ ذرائع دے مطابق وفاقی وزیر پٹرولیم تے چیئرمین اوگرا نے ڈیلرز دے تناں مطالبات تے غور لئی ست دن دی مہلت منگی تے یقین دہانی کرائی کہ ڈیلرز دے تحفظات دا جائزہ لے کے قابلِ عمل حل کڈھن دی کوشش کیتی جائے گی۔ دوجے پاسے ہڑتال دے اعلان توں بعد ملک دے مختلف شہراں وچ شہریاں نے ممکنہ ایندھن دی قلت دے خدشے نوں مدنظر رکھدے ہوئے پٹرول پمپاں ول رخ کرنا شروع کر دتا جبکہ کاروباری تے ٹرانسپورٹ حلقیاں نے حکومت تے پٹرول پمپ مالکان توں فوری مذاکرات دے ذریعے مسئلے دا حل کڈھن تے زور دتا ہے۔