وزیراعظم آفس وچ مصنوعی ذہانت (AI) تے مبنی ٹریکنگ نظام دا افتتاح

خودکار احتسابی نظام نال فیصلہ سازی تیز ، پالیسیاں دا نفاذ موثر ہووے گا: شہباز شریف ، وزیراعظم نال وزیراعلیٰ گلگت بلتستان امجد حسین دی ملاقات ، مل کے کم کرن دا عزم۔

اسلام آباد (نامہ نگار) وزیراعظم شہباز شریف نے وزیراعظم آفس وچ مصنوعی ذہانت (AI) تے مبنی جدید ٹریکنگ تے فیصلہ سازی نظام دا افتتاح کر دتا جس دا مقصد وزیراعظم دیاں ہدایتاں تے عملدرآمد ، پیشرفت تے نگرانی نوں ٹریک کرنا ہے تاکہ خودکار احتسابی نظام دے نال فیصلہ سازی دا عمل تیز ہووے تے وزیراعظم دیاں ہدایتاں تے حکومتی پالیسیاں دا مؤثر نفاذ یقینی ، بروقت تے معیاری بنایا جا سکے۔ مصنوعی ذہانت تے مبنی جدید ترین ٹریکنگ تے فیصلہ سازی دے نظام دی افتتاحی تقریب توں خطاب کردے ہوئے وزیراعظم نے مصنوعی ذہانت تے مبنی جدید ٹریکنگ تے فیصلہ سازی دے نظام تے مکمل عملدرآمد دی ہدایت کیتی تے کہیا کہ اج توں بعد کوئی روایتی فائل نظام نہیں ہووے گا ، عوامی فلاح و بہبود تے خدمت نوں یقینی بناؤن لئی اس نظام دا مکمل نفاذ یقینی بنایا جائے۔ وزیراعظم نے اس نظام دی تیاری تے فعالیت لئی وفاقی وزرا احد خان چیمہ ، شزا فاطمہ خواجہ تے متعلقہ حکام دی تعریف کیتی۔ اوہناں نے ہدایت کیتی کہ تمام وزارتاں اس نظام نوں اختیار کردے ہوئے اس دے تحت امور سرانجام دین۔ اوہناں کہیا کہ اب روایتی انداز وچ فائلاں لے کے گھمن دی لوڑ نہیں ، سارے امور اس جدید نظام دے ذریعے نمٹائے جان۔

اس موقعے تے وفاقی وزیر احد خان چیمہ نے کہیا کہ جدید طرزِ حکمرانی لئی مصنوعی ذہانت تے ڈیٹا تے مبنی نظام فعال کر دتا گیا ہے ، ایہہ جدید نظام حکومتی فیصلیاں وچ شفافیت تے بروقت اقدامات دے حوالے نال انتہائی اہم ہے ، پرانے نظام وچ سارے تقاضے پورے نہیں ہوندے سن تے آؤٹ پٹ توں مکمل استفادہ نہیں کیتا جا سکدا سی ، اس لئی انہاں خامیاں نوں دور کردے ہوئے ایہہ جدید نظام متعارف کرایا گیا ہے۔ وفاقی وزیر آئی ٹی شزہ فاطمہ خواجہ نے کہیا وزیراعظم شہباز شریف نے بطور وزیراعلیٰ ماضی وچ ڈیجیٹائزیشن دا آغاز کیتا سی جس توں بعد ہن اسیں ڈیجیٹل توں اے آئی (AI) ول گامزن ہاں تے سارے شعبیاں وچ جدید ٹیکنالوجی بروئے کار لا رہے ہاں۔ وزیراعظم نوں اس جدید نظام دے بارے وچ دتی گئی بریفنگ وچ دسیا گیا کہ “وزیراعظم آفس سسٹم” (پی ایم او ایس) پاکستان دا پہلا مصنوعی ذہانت نال چلن والا نظام ہے ، ایہہ وزیراعظم آفس دا سرکاری ڈیجیٹل پلیٹ فارم ہے جس دا مقصد وزیراعظم دے احکامات جاری ہون توں لے کے اوہناں تے عملدرآمد ، اوہناں دی تکمیل تے تکمیل توں بعد نگرانی تک سارے امور دی انجام دہی دا خودکار نظام متعارف کرانا ہے۔

دریں اثنا شہباز شریف نال وزیراعلیٰ گلگت بلتستان امجد حسین نے ملاقات کیتی ، وزیراعظم نے امجد حسین نوں وزیراعلیٰ گلگت بلتستان دا عہدہ سنبھالن تے مبارکباد دتی تے کہیا وفاقی حکومت گلگت بلتستان دے عوام دی فلاح و بہبود لئی نویں منتخب حکومت نال مل کے کم کرن لئی پرعزم ہے۔ وفاقی حکومت گلگت بلتستان دی فلاح و بہبود لئی قابلِ تجدید توانائی ، سیاحت ، انفراسٹرکچر ، صحت ، تعلیم تے ہور شعبیاں وچ ترقیاتی منصوبیاں دے حوالے نال اقدامات لے رہی ہے۔ وزیراعظم نے کہیا کہ وفاقی حکومت دے منصوبیاں وچ 100 میگاواٹ دا شمسی توانائی تے دانش سکولاں دے قیام دے منصوبے سرِ فہرست نیں۔ وفاقی حکومت گلگت بلتستان دے عوام دی سہولت لئی گلگت وچ پاکستان آسان خدمت سینٹر بنان دی منصوبہ بندی کر رہی ہے۔