عدالتی انتظام وچ ترک تجربیاں توں بھرپور فائدہ چُکیا : چیف جسٹس

پاکستان تے ترکیہ دیاں وکلا تنظیماں وچکار رابطیاں نال پیشہ ورانہ صلاحیت مزید مضبوط ہوئے گی

اسلام آباد (اے پی پی) چیف جسٹس پاکستان جسٹس یحییٰ آفریدی نے کہیا ہے کہ پاکستان تے ترکیہ دے درمیان تاریخی ، برادرانہ تے باہمی احترام تے مبنی تعلقات دونوں ملکاں دے درمیان عدالتی تے قانونی شعبیاں وچ تعاون دے فروغ لئی مضبوط بنیاد فراہم کردے نیں جدکہ وکلا تنظیماں دے درمیان رابطیاں نال ادارہ جاتی تعاون تے پیشہ ورانہ صلاحیت مزید مضبوط ہوئے گی۔ سپریم کورٹ دے شعبہ تعلقات عامہ ولوں جاری اعلامیے دے مطابق ایہہ گل اوہناں نے سپریم کورٹ پاکستان وچ پاکستان بار کونسل دی دعوت تے پاکستان دے دورے تے آئے استنبول بار ایسوسی ایشن دے وفد نال ملاقات دے دوران کہی۔ ایس موقعے تے پاکستان وچ ترکیہ دے سفیر ڈاکٹر عرفان نذیراوغلو تے پاکستان بار کونسل دے وائس چیئرمین پیر محمد مسعود چشتی بھی موجود سن۔

چیف جسٹس نے وفد دا خیرمقدم کردے ہوئے کہیا کہ پاکستان نے عدالتی انتظام تے قانونی اصلاحات دے شعبے وچ ترکیہ دے تجربیاں توں بھرپور فائدہ چُکیا ہے۔ اوہناں نے دونوں ملکاں دیاں قانونی برادریاں دے درمیان ودھدے ہوئے تعاون دا خیرمقدم کردے ہوئے کہیا کہ عدلیہ دے نال نال بار ایسوسی ایشنز دے درمیان پیشہ ورانہ رابطے بھی ادارہ جاتی تعلقات نوں مزید مضبوط تے باہمی مفاہمت نوں فروغ دین گے۔ استنبول بار ایسوسی ایشن دے وفد نے سپریم کورٹ پاکستان ولوں پرجوش میزبانی تے شکریہ ادا کیتا تے پاکستان تے ترکیہ دی وکلا برادری دے درمیان علم ، پیشہ ورانہ مہارت تے بہترین تجربیاں دے تبادلے راہیں تعاون نوں مزید فروغ دین دے عزم دا اظہار کیتا۔