گلوبل بانڈ: عالمی بینکاں دے کنسورشیم دا اعلان 3 سال لئی تقرری

وزیرِ خزانہ نے عالمی بینکاں دے حکام نال ورچوئل ملاقات وچ کنسورشیم نوں حتمی شکل دتی

اسلام آباد (دنیا رپورٹ) حکومت نے پاکستان دے گلوبل میڈیم ٹرم نوٹ تے انٹرنیشنل سکوک پروگراماں لئی عالمی بینکاں تے مشتمل کنسورشیم دا اعلان کر دتا۔ وزیرِ خزانہ محمد اورنگزیب نے واشنگٹن توں عالمی بینکاں دے اعلیٰ حکام نال ورچوئل ملاقات دے دوران کنسورشیم نوں حتمی شکل دتی۔ وزارتِ خزانہ دے مطابق یوروبانڈ کنسورشیم وچ سٹینڈرڈ چارٹرڈ بینک ، سٹی بینک ، ڈوئچے بینک ، ایمریٹس این بی ڈی کیپٹل تے ایم یو ایف جی شامل نیں ، جدکہ انٹرنیشنل سکوک کنسورشیم وچ سٹینڈرڈ چارٹرڈ ، دبئی اسلامک بینک ، سٹی بینک ، ایمریٹس این بی ڈی کیپٹل تے مشرق بینک نوں شامل کیتا گیا ہے۔ روپے دی مالیت تے مبنی ڈالر سیٹلڈ بانڈز لئی سٹینڈرڈ چارٹرڈ ، سٹی بینک تے ڈوئچے بینک منتخب کیتے گئے نیں۔ وزارتِ خزانہ دا کہنا ہے کہ عالمی بینکاں دے ایہہ کنسورشیم آئندہ تن سالاں لئی مقرر کیتے گئے نیں تے حکومت لوڑ دے مطابق یوروبانڈز ، سکوک تے دوجے عالمی بانڈز جاری کرے گی۔ وزیرِ خزانہ نے کہیا کہ حکومت دا ہدف عالمی سرمایہ کاراں دی تعداد ودھانا ، قرضے دی لاگت گھٹانا تے عالمی سرمایہ منڈیاں وچ پاکستان دی موجودگی مزید مضبوط بنانا ہے۔