کینیڈا نال دوستی نویاں بلندیاں تیکر لے کے جاویں گے: یوسف رضا گیلانی
وزیرِ خارجہ دا دورہ تعلقات تے سرمایہ کاری نوں ودھان وچ نویں پیش رفت دا سبب بنے گا
اسلام آباد (اپنے رپورٹر توں): چیئرمین سینیٹ سید یوسف رضا گیلانی نے کہیا ہے کہ پاکستان پارلیمانی سفارتکاری، تجارت تے عوامی رابطیاں نوں ودھان دے ذریعے کینیڈا نال اپنی دیرینہ دوستی نوں نویاں بلندیاں تیکر لے کے جان لئی پرعزم ہے۔
کینیڈا دی وزیرِ خارجہ انیتا آنند دے اعزاز وچ دتی گئی استقبالیہ تقریب تے بعد وچ ملاقات دوران اوہناں نے کہیا کہ پاکستان تے کینیڈا دے وچکار تقریباً اٹھ دہائیاں تے پھیلے تعلقات آپسی احترام، معاشی تعاون، تعلیمی رابطیاں تے کینیڈا وچ وسدی پاکستانی برادری دیاں خدمات تے قائم نیں۔ اوہناں نے کہیا کہ دوطرفہ تجارت دوہاں ملکاں دے تعلقات دا بنیادی ستون ہے تے کینیڈا پاکستان دا بھروسے جوگ معاشی بھائوال (پارٹنر) ہے۔
اوہناں دے آکھن مطابق کینیڈا توں منگوائیاں جان والیاں زرعی اجناس پاکستان دی خوراکی سلامتی تے صنعتی ترقی وچ اہم کردار ادا کر رہیاں نیں۔ یوسف رضا گیلانی نے توانائی، صاف ٹیکنالوجی، کان کنی، انفارمیشن ٹیکنالوجی، زراعت، سرمایہ کاری تے تعلیم سمیت وکھ وکھ شعبیاں وچ تعاون ودھان دی لوڑ تے زور دتا۔
اوہناں نے پارلیمانی رابطے مضبوط بنان، کثیرالجہتی فورمز تے تعاون ودھان تے ایس آئی ایف سی (SIFC) دے تحت کینیڈین سرمایہ کاری دی حوصلہ افزائی دا وی اظہار کیتا۔ چیئرمین سینیٹ نے امید جتائی کہ وزیرِ خارجہ انیتا آنند دا دورہ دوہاں ملکاں دے تعلقات، تجارت تے سرمایہ کاری نوں ودھان وچ نویں پیش رفت دا سبب بنے گا
