لندن: پاکستانی ہائی کمشنر دیاں برطانوی ارکانِ پارلیمنٹ نال ملاقاتاں
آزاد کشمیر الیکشن، دوطرفہ تعلقات تے خطے دی صورتحال تے وچار وٹاندرا، مسلیاں دے حل تے اتفاق
فریقاں نوں مل بیٹھ کے آزاد کشمیر دی صورتحال دا حل لبھنا چاہیدا ہے: یاسمین قریشی، لارڈ قربان
لندن، اسلام آباد برطانیہ وچ پاکستان دے نویں تعینات ہائی کمشنر ٹیپو عثمان نے برطانوی پارلیمنٹ دے کشمیری نژاد ارکان نال اہم ملاقاتاں کیتیاں، جنہاں وچ لارڈ قربان حسین، یاسمین قریشی تے محمد یاسین شامل سن۔
ملاقاتاں وچ پاکستان تے برطانیہ دے دوطرفہ تعلقات، کشمیری برادری تے خاص طور تے آزاد جموں و کشمیر دی تازہ صورتحال تے تفصیلی گل بات کیتی گئی۔ اس موقعے تے 27 جولائی نوں آزاد کشمیر وچ ہون والے چوناواں (انتخابات) تے وی وچار وٹاندرا کیتا گیا۔
ملاقاتاں توں بعد میڈیا نال گل بات کردے ہوئے لارڈ قربان حسین نے کہیا کہ ہائی کمشنر نال ملاقات تعارفی نوعیت دی سی جس وچ برطانیہ، پاکستان تے آزاد کشمیر دی مجموعی صورتحال زیرِ بحث آئی۔ اوہناں کہیا کہ فریق اس گل تے متفق نیں کہ مسلیاں دا حل پرامن طریقے نال کڈیا جانا چاہیدا ہے۔
لارڈ قربان حسین دا کہنا سی کہ اوہ تے پاکستانی ہائی کمشنر پرامید نیں کہ آزاد کشمیر وچ حالات جلد معمول تے آ جان گے۔ اوہناں کہیا کہ آؤن والے چوناواں وچ عوام اپنی مرضی دی حکومت چونے گی، جبکہ مسلیاں دے حل لئی فریقاں نوں گل بات دی میز تے آؤنا ہووے گا۔ اوہناں دا مزید کہنا سی کہ دنیا وچ وڈے وڈے جھگڑیاں دا حل گل بات نال ای کڈیا جاندا ہے، امید ہے کہ ایہہ معاملے وی مذاکرات دے ذریعے حل ہو جان گے۔
اس موقعے تے برطانوی رکنِ پارلیمنٹ یاسمین قریشی نے کہیا کہ سارے متعلقہ فریقاں نوں مل بیٹھ کے آزاد کشمیر دی صورتحال دا حل لبھنا چاہیدا ہے۔ اوہناں کہیا کہ مسئلے دا پرامن حل سبھ دے مفاد وچ ہے۔
