گیس فیلڈ والے علاقیاں نوں کنکشن نہ ملن تے پارلیمانی کمیٹی شدید برہم، عملدرآمد منصوبہ طلب کر لیا

وزارتِ پیٹرولیم اک ہفتے وچ جامع تے قابلِ عمل منصوبہ پیش کرے: سینیٹ ذیلی کمیٹی دی سخت ہدایت

سپریم کورٹ تے وزیراعظم دے احکام تے عملدرآمد وچ 20 سالاں توں ودھ تاخیر دے ذمہ داراں دا تعین کرن دا وی فیصلہ

اسلام آباد (سید قیصر شاہ): سینیٹ دی قائمہ کمیٹی برائے پیٹرولیم دی ذیلی کمیٹی نے گیس فیلڈز توں پنج کلومیٹر دے دائرے وچ وسدیاں آبادیاں نوں گیس کنکشن دین بابت سپریم کورٹ تے وزیراعظم دے احکام تے دو دہائیاں توں ودھ ویلے توں عمل نہ ہون تے شدید برہمی تے ڈونگھی تشویش دا اظہار کردیاں وزارتِ پیٹرولیم نوں اک ہفتے اندر جامع، مرحلہ وار تے قابلِ عمل منصوبہ پیش کرن دی ہدایت کیتی ہے۔

اجلاس وچ سپریم کورٹ تے وزیراعظم دے احکام تے عملدرآمد وچ تاخیر دے ذمہ داراں دا تعین کرن دا وی فیصلہ کیتا گیا۔

کنوینر سینیٹر جام سیف اللہ خان دھاریجو دی صدارت ہیٹھ ہوئے اجلاس وچ دَسیا گیا کہ وزارتِ خزانہ نے فنڈز دی فراہمی دی اصولی یقین دہانی کرائی ہے، جبکہ ضلع گھوٹکی دے نشاندہی کیتے گئے علاقیاں وچ گیس فراہمی لئی لگ بھگ 67 کروڑ روپے درکار ہون گے۔ کنوینر دَسیا کہ ضلع گھوٹکی دے 57 پنڈاں وچوں 42 پنڈ گیس فیلڈز توں پنج کلومیٹر دے دائرے وچ نیں، پر ایس دے باوجود 2021 وچ منظور ہون والے کئی منصوبے ہن تک پورے نہیں ہو سکے۔