ڈپٹی کمشنر، اسسٹنٹ کمشنر فیلڈ وِچ رہن، دریاواں، نہراں، نالیاں دی مانیٹرنگ کرن: مریم نواز

سیلابی صورتحال وِچ نہان توں پرہیز، خستہ حال مکان چھڈن دی ہدایت: مریم نواز

لاہور:

وزیراعلیٰ پنجاب مریم نواز شریف نے عوام نوں اپیل کیتی اے کہ مون سون تے سیلابی صورتحال وِچ نہراں، دریاواں تے برساتی نالیاں دے نیڑے نہ جان تے نہان دا خطرہ بالکل نہ لین۔ اوہناں نے والدین نوں ہدایت کیتی کہ اوہ اپنے بچےآں نوں سیلابی ریلیاں وِچ جان توں روکن۔ ایہدے نال ہی اوہناں نے کمزور چھتاں، دیواراں تے بوسیدہ عمارتاں دے مکیناں نوں ازخود محفوظ تھاواں تے منتقل ہون دی اپیل کیتی اے۔

وزیراعلیٰ نے بارشاں پاروں ہون والے حادثات وِچ انسانی جاناں دے ضیاع تے دُکھ دا اظہار کیتا تے متاثرہ ٹبراں دیاں لوڑاں پوریاں کرن دی ہدایت کیتی۔ اوہناں نے انتظامیہ نوں شہراں، سڑکاں تے انڈر پاسز توں بارشی پانی دی فوری نکاسی نوں یقینی بنان دا حکم دتا۔ واسا (WASA) دیاں کوششاں نال گجرات سمیت پنجاب دے کئی شہراں وِچ جمع پانی نوں کجھ گھنٹیاں وِچ ہی صاف کر دتا گیا۔ پی ڈی ایم اے (PDMA) مطابق پچھلے 24 گھنٹیاں وِچ حادثات پاروں 17 شہری جاں بحق تے 107 زخمی ہوئے نیں۔

دیہی عورتاں لئی مفت مویشی ونڈن پروگرام دا آغاز

لاہور:

وزیراعلیٰ مریم نواز دے ویژن تحت دیہی عورتاں نوں معاشی طور تے خود مختار بنان لئی مفت مویشی پروگرام دا آغاز کر دتا گیا اے۔

پہلے مرحلے وِچ پنجاب دے 13 اضلاع (ملتان، رحیم یار خان، تونسہ، بہاولنگر، خانیوال، وہاڑی، لودھراں، ڈیرہ غازی خان، مظفر گڑھ، راجن پور، لیہ، کوٹ ادو تے بہاولپور) وِچ عورتاں نوں مفت مویشی ونڈے جا رہے نیں۔ وزیراعلیٰ دا کہنا سی کہ دیہی عورتاں نوں معاشی دھارے وِچ لیا کے ہی غربت دا خاتمہ کیتا جا سکدا اے۔