جولائی 2024 توں پہلاں دے وفاقی ملازمین کنٹریبیوٹری پنشن توں مستثنیٰ
مسلسل وفاقی ملازمت رکھن والیاں نوں دوجی تعیناتی تے نویں تقرری تصور نہیں کیتا جائے گا: وزارتِ خزانہ
اہل ملازمین توں کٹی ہوئی کنٹریبیوٹری پنشن رقم واپس یا ایڈجسٹ کیتی جائے گی
اسلام آباد (نیوز رپورٹر) وزارتِ خزانہ نے وفاقی وزارتوں، ڈویژناں تے محکمیاں نوں کنٹریبیوٹری پنشن بارے پالیسی وضاحت جاری کر دتی اے۔
وزارتِ خزانہ دے مطابق ایہوجہے سرکاری ملازمین جیہناں نے یکم جولائی 2024 توں پہلاں وفاقی حکومت وِچ مستقل بنیاداں تے ملازمت اختیار کیتی ہووے تے قاعدیاں مطابق بغیر کسی وقفے دے وفاقی حکومت دے کسی دوجے ادارے یا عہدے تے تعینات ہوئے ہون، ایہناں نوں نویں تقرری تصور نہیں کیتا جائے گا۔
وزارتِ خزانہ دے مطابق ایہوجہے ملازمین وفاقی حکومت دی ڈیفائنڈ کنٹریبیوشن پنشن فنڈ (کنٹریبیوٹری پنشن) سکیم 2024 دے دائرہ کار وِچ نہیں آؤندے کیونکہ متعلقہ قاعدیاں تحت ایہناں ملازمین نوں ایس سکیم توں مستثنیٰ قرار دتا گیا اے جیہناں دی سرکاری ملازمت دا تسلسل برقرار رہا ہووے۔
پالیسی دے مطابق ایہوجہے ملازمین دی تنخواہاں توں کنٹریبیوٹری پنشن فنڈ دی کٹوتی نہیں کیتی جائے گی، جبکہ اگر کسی اہل ملازم دی تنخواہ توں ایس مد وِچ پہلاں ای رقم کاٹی جا چکی اے تے اوہنوں قاعدیاں مطابق ایڈجسٹ یا واپس کیتا جائے گا۔
وزارتِ خزانہ نے واضح کیتا اے کہ ایس پالیسی دا اطلاق ایہناں تمام وفاقی سرکاری ملازمین تے ہوئے گا جو مقررہ شرطاں تے پورا اتردے نیں، جبکہ متعلقہ وزارتیں، ڈویژن، اکاؤنٹس دفاتر تے دوجے ادارے آئندہ ایس ای پالیسی مطابق عملدرآمد نوں یقینی بناؤن گے۔
