عمران نال اختلاف جرنیلاں توں اقتدار لین تے سی: جاوید ہاشمی

پی ٹی آئی دا حصہ نہیں، جمہوریت لئی آواز اٹھاواں گا؛ تمام سیاسی قیدیاں نوں رہا کیتا جاوے: جاوید ہاشمی

عمران خان نے تحریکِ انصاف، انصاف لئی بنائی، اج اوہنوں انصاف نہیں مل رہا

لاہور (کورٹ رپورٹر) سینئر سیاستدان مخدوم جاوید ہاشمی نے آکھیا اے کہ میں پی ٹی آئی دا حصہ نہیں ہاں پر جمہوریت لئی آواز اٹھاواں گا، سیاسی قیدیاں نوں رہا کیتا جاوے۔ بانی پی ٹی آئی عمران خان دی رہائی لئی لاہور ہائیکورٹ وِچ منعقدہ وکلاء کنونشن نال خطاب کردے ہوئے اوہناں نے آکھیا کہ عمران خان نے تحریکِ انصاف، انصاف لئی بنائی سی پر اج اوہنوں ای انصاف نہیں مل رہا۔ اوہناں آکھیا کہ پاکستان وکیل نے بنایا سی ایس نوں وکلاء ای بچاؤن گے، وکلاء ای واحد راستہ نیں جو جمہوریت لئی جدوجہد کر سکدے نیں۔

اوہناں آکھیا کہ کشمیر وِچ لوکاں نوں ماریا جا رہا اے، پاکستان نوں دوبارہ کھڑا کرن لئی عمران خان نوں لیاؤنا ضروری اے، بانی پی ٹی آئی نے جو قوم نوں شعور دتا وہ کسے نے نہیں دتا۔ پاکستان نے چلنا اے تے ایہہ چلے گا، سیاستداناں نوں اپنا قبلہ درست کرنا ہووے گا۔ اوہناں آکھیا کہ عمران خان نال میرا اختلاف جرنیلاں توں اقتدار لین تے سی، اوہناں نوں آکھیا کہ اسٹیبلشمنٹ توں حکومت نہ لوو، عوام دے ووٹ نال اقتدار وِچ آؤ، پھر کچھ مہینیاں بعد بانی پی ٹی آئی نوں میری بات سمجھ آ گئی۔ 2024ء دے انتخابات وِچ دھاندلی کیتی گئی، عوام دا ووٹ کھوہ کے اقتدار موجودہ حکومت نوں دتا گیا۔