سندھ 177: ترقیاتی سکیمیاں لئی صرف اِک ہزار روپئے رکھے گئے
کراچی (سٹاف رپورٹر) حکومتِ سندھ دا دہرا معیار ساہمݨے آ گیا۔ 177 ترقیاتی سکیمیاں لئی صرف اِک ہزار روپئے رکھے گئے، من پسند ٹھیکیداراں دیاں سکیمیاں لئی سَو فیصد رقم رکھݨ دا انکشاف، ناانصافی دے خلاف ٹھیکیداراں نے کراچی پریس کلب دے ساہمݨے احتجاجی دھرنا دے دِتا۔
رپورٹ دے مطابق محکمہ ورکس اینڈ سروسز سندھ وچ ترقیاتی فنڈاں دی غیر منصفانہ ونڈ، مبینہ لُکے ٹینڈراں تے کرپشن دے خلاف کنٹریکٹرز ایسوسی ایشن آف سندھ نے ڈاڈھا احتجاج کیتا اے۔ کنٹریکٹر ایسوسی ایشن دے مطابق 177 ترقیاتی سکیمیاں لئی پُورے مالی سال دا بجٹ صرف 1000 روپئے طے کرنا چھوٹے تے پیشہ ور ٹھیکیداراں نال کھُلّی ناانصافی اے جیہدے نال ایہناں منصوبیاں دا سِرے چَڑھنا عملی طور اُتے ناممکن ہو جاندا اے۔ ایس دے اُلٹ کجھ بااثر تے بااختیار ٹھیکیداراں دیاں سکیمیاں اُتے پُورا بجٹ رکھیا گیا اے، ایہہ وِتھرا وسائلاں دی منصفانہ ونڈ تے شفافیت دے اصولاں دے خلاف اے۔
