مسئلہ کشمیر، سندھ طاس معاہدے دی معطلی خطے وچ عدم استحکام دی بنیادی وجہاں: اسحاق ڈار
منیلا، اسلام آباد نائب وزیر اعظم تے وزیر خارجہ سینیٹر اسحاق ڈار نے عالمی برادری تے آسیان ریجنل فورم (اے آر ایف) تے زور دتا کہ وہ خطے دے بنیادی تنازعیاں دے پرامن حل دی حمایت کرن، جموں تے کشمیر دا حل طلب تنازعہ تے بھارت ولوں سندھ طاس معاہدے نوں یکطرفہ طور تے معطل رکھن دا فیصلہ جنوبی ایشیا وچ عدم استحکام دی بنیادی وجہاں ہن۔
پاکستان مسئلہ کشمیر دے پرامن تے منصفانہ حل دی حمایت جاری رکھے گا، نائب وزیر اعظم نے انہاں خیالات دا اظہار جمعرات نوں ایتھے اے آر ایف دے 33 ویں وزارتی اجلاس نال خطاب کردے ہوئے کیتا۔ انہاں نے عالمی تے علاقائی سلامتی نوں درپیش اٹھے وڈے چیلنجاں دا ذکر کیتا جنہاں وچ جنوبی ایشیا دا استحکام، خلیج دی صورتحال، غزہ، انسدادِ دہشت گردی، افغانستان، یوکرین، جنوبی بحیرہ چین تے موسمیاتی تبدیلی شامل ہن۔ انہاں نے اجلاس نوں دسیایا کہ دیرینہ تنازعیاں بالخصوص بھارت تے پاکستان دے درمیان جموں تے کشمیر دے مسئلے نوں حل نہ کیتے جان نال علاقائی استحکام نوں سنگین خطرے لاحق ہوئے ہن۔ انہاں نے اقوامِ متحدہ دے منشور، سلامتی کونسل دی متعلقہ قرارداداں تے کشمیری عوام دی امنگاں دے مطابق مسئلہ کشمیر دے منصفانہ تے پرامن حل لئی پاکستان دے عزم دا اعادہ کیتا۔
اسحاق ڈار نے بھارت ولوں سندھ طاس معاہدے نوں یکطرفہ طور تے معطل رکھن دے فیصلے تے ڈونگھی تشویش دا اظہار کردے ہوئے خبردار کیتا کہ پانی نوں بطور ہتھیار استعمال کرن دی کوشش بین الاقوامی ذمہ داریاں دی خلاف ورزی اے تے اس نال پاکستان دے 25 کروڑ عوام دی زندگی تے روزگار نوں خطرہ لاحق اے۔ اسیں اس سنگین تے اشتعال انگیز صورتحال نوں نظر انداز کرن دے متحمل نہیں ہو سکدے۔ انہاں نے کہیا کہ آئو اسیں سارے امن تے استحکام دے معمار بنئے تے من مانے، غیر قانونی تے یکطرفہ اقداماں توں پیدا ہوؤن والے چیلنجاں نال نمٹن لئی مل کے کم کریے۔ انہاں نے عالمی برادری بالخصوص اے آر ایف دے رکن ملکاں تے زور دتا کہ وہ انہاں من مانے، غیر قانونی تے یکطرفہ اقداماں دا نوٹس لین تے بین الاقوامی قانون دی پاسداری نوں یقینی بنائن۔
خلیج دی صورتحال تے بات کردے ہوئے نائب وزیر اعظم نے تمام فریقاں تے زور دتا کہ وہ اپنے وعدیاں دی پاسداری کرن، تحمل دا مظاہرہ کرن تے بات چیت دی حمایت کرن تاکہ علاقائی استحکام، آبنائے ہرمز دی بحالی تے بین الاقوامی بحری آمد و رفت دی بلاشرط بحالی یقینی بنائی جا سکے۔ مقبوضہ فلسطینی علاقیاں وچ انسانی بحران دا ذکر کردے ہوئے نائب وزیر اعظم نے غزہ وچ ہوؤن والے مظالم دی شدید مذمت کیتی تے 1967ء توں پہلے دی سرحداں تے مشتمل آزاد، خودمختار تے جغرافیائی طور تے مربوط فلسطینی ریاست دے قیام لئی پاکستان دی غیر متزلزل حمایت دا اعادہ کیتا جس دا دارالحکومت القدس الشریف ہووے۔ انہاں نے افغان طالبان حکومت تے زور دتا کہ وہ اس بات نوں یقینی بنائے کہ افغان سرزمین نوں تحریک طالبان پاکستان (فتنہ الخوارج) تے اس نال منسلک گروہاں سمیت کسے بھی دہشت گرد تنظیم ولوں گوانڈھی ملکاں دے خلاف استعمال نہ ہوؤن دتا جاوے۔
انہاں نے کہیا کہ انہاں وعدیاں دی تکمیل نال جنوبی تے وسطی ایشیا وچ تجارت تے علاقائی رابطیاں دے وسیع مواقع پیدا ہون گے۔ دوجے عالمی امور تے پاکستان دے موقف دا اعادہ کردے ہوئے نائب وزیر اعظم نے یوکرین تے جنوبی بحیرہ چین دے تنازعیاں دے سفارتی حل دی حمایت دا اظہار کیتا تے ون چائنا پالیسی تے پاکستان دے پختہ عزم نوں دہرایا۔ انہاں نے موسمیاتی تبدیلی نوں ترقی پذیر ملکاں لئی وڈا چیلنج قرار دیندے ہوئے کہیا کہ اس نال نمٹن لئی عالمی تعاون نوں ہور مضبوط بناؤن دی لوڑ اے۔ اسحاق ڈار نے آسیان ریجنل فورم اجلاس توں پہلے سنگاپور دے وزیر خارجہ ڈاکٹر ویوین بالاکرشنن تے انڈونیشیا دے وزیر خارجہ سوگیونو نال ملاقات کیتی۔ اس دوران رہنماواں نے علاقائی تے بین الاقوامی صورتحال تے تبادلہ خیال کیتا۔ علاوہ ازیں نائب وزیر اعظم اسحاق ڈار 33 ویں آسیان ریجنل فورم وچ شرکت توں بعد منیلا توں کرغزستان روانہ ہو گئے۔ ترجمان دفتر خارجہ دے مطابق اسحاق ڈار 23 تے 24 جولائی نوں ہوؤن والے ایس سی او وزرائے خارجہ کونسل دے اجلاس وچ پاکستانی وفد دی قیادت کرن گے۔
