حوثیاں دے حملے صورتحال ہور خراب کرن گے: پاکستان

سعودیہ نال دفاع سمیت سارے معاہدیاں تے عملدرآمد دے پابند: دفتر خارجہ، کیہڑا حملہ ریڈ لائنز سمجھیا جاوے یا پاک بحریہ دی تعیناتی، ایہ آپریشنل معاملے ہن

اسلام آباد (وقائع نگار، مانیٹرنگ ڈیسک) ترجمان دفتر خارجہ طاہر حسین اندرابی نے کہیا حوثی ملیشیا دی سعودی عرب تے کمرشل جہاز رانی نوں دھمکیاں قابلِ مذمت ہن، سعودی عرب دی علاقائی سلامتی تے خودمختاری دے تحفظ دا اعادہ کردے ہن، یمنی گروہاں دے سعودی عرب تے حملے خطے دی صورتحال ہور خراب کرن گے۔ نیوز بریفنگ دے دوران ترجمان دفتر خارجہ نے کہیا کہ پاکستان نے بحیرہ احمر وچ تجارتی جہازاں نوں نشانہ بناؤن دے اعلانات دی شدید مذمت کیتی، پاکستان اپنے بحری مفاداں دے تحفظ لئی پرعزم اے، تجارتی جہازاں نوں دھمکیاں علاقائی امن تے علاقائی تجارت لئی سنگین خطرہ ہن، بحری جہازاں نوں دھمکیاں عالمی قانوناں تے بحری اصولاں دی کھلی خلاف ورزی ہن۔

طاہر حسین اندرابی نے کہیا کہ اگر ساڈے جہازاں تے تجارتی مفاداں تے حملہ ہویا تے دفاع دا حق اے، پاکستان سعودی عرب نال دفاع سمیت سارے معاہدیاں تے عملدرآمد دا پابند اے، کیہڑا حملہ ریڈ لائنز سمجھیا جاوے یا پاک بحریہ دی تعیناتی، ایہ آپریشنل معاملے ہن۔ انہاں نے کہیا کہ ریڈ لائنز تے تعیناتیاں دے معاملے آپریشنل تفصیلاں دے زمرے وچ آؤندے ہن، آپریشنل تکنیکی تفصیلاں مسلح افواج ہی دیکھن گیاں، پاکستان دوطرفہ معاہدیاں تے بین الاقوامی قانوناں تے عمل کرے گا۔ ترجمان دفتر خارجہ نے کہیا کہ پاکستان نوں مشرقِ وسطیٰ وچ کشیدگی تے تشویش اے، پاکستان نے سارے فریقاں تے ضبط تے تحمل دا مظاہرہ کرن تے زور دتا، ایرانی وزیرِ داخلہ نے وزیرِ اعظم، نائب وزیرِ اعظم تے فیلڈ مارشل نال ملاقاتاں کیتیاں، اسحاق ڈار نے آسیان ریجنل فورم دے موقعے تے مختلف ملکاں دے وزرائے خارجہ نال ملاقاتاں کیتیاں۔ ملاقاتاں وچ مشرقِ وسطیٰ وچ قیامِ امن تے کشیدگی دے خاتمے دی اہمیت تے زور دتا گیا۔

انہاں نے مزید کہیا کہ پاکستان دی خطے وچ کشیدگی گھٹ کرن لئی کوشساں جاری ہن، ایرانی وزیرِ داخلہ نے اسی مناسبت نال پاکستان دا دورہ کیتا اے، منیلا وچ آسیان اجلاس دی سائیڈ لائنز تے پاک مصر وزرائے خارجہ دی ملاقات ہوئی، پاک مصر وزرائے خارجہ نے علاقائی سالمیت تے خودمختاری دے تحفظ تے زور دتا۔ ترجمان دفتر خارجہ نے کہیا کہ پاکستان یورپی یونین دی جی ایس پی رپورٹ دا خیرمقدم کردا اے، یورپی یونین دی رپورٹ پاکستان دی پیشرفت دا مجموعی احاطہ نہیں کردی، جی ایس پی پلس درجہ دوہاں فریقاں لئی باہمی طور تے مفید اے، یورپی کمیشن تے دوجے اداریاں نال مثبت رابطے برقرار رکھاں گے۔

طاہر حسین اندرابی نے کہیا کہ پاکستان تے امریکا دے درمیان تجارتی مذاکرات جاری ہن، پاک امریکا تجارتی مذاکرات تے ٹیرف دا معاملہ ہلے طے نہیں ہویا، ٹیرف تے چائلڈ لیبر تے امریکا نوں پاکستانی موقف توں آگاہ کر دتا۔ انہاں نے مزید کہیا کہ کارگل جنگ دا معاملہ ہن تاریخ دا حصہ بن چکا اے، مرحوم سرتاج عزیز دی کارگل دے حوالے نال کتاب بہترین اے۔ ترجمان دفتر خارجہ دا کہنا سی کہ پاکستان مقبوضہ کشمیر وچ انسانی حقوق دی صورتحال تے آواز اٹھاؤندا رہے گا، مقبوضہ کشمیر وچ بطور قابض فورس بھارت انسانی حقوق یقینی بناؤن دا پابند اے، کلبھوشن یادیو پاکستان وچ بھارتی دہشت گردی دی جیوندی جاگدی علامت اے۔ طاہر حسین اندرابی نے کہیا کہ کاکروچ جنتا پارٹی دا احتجاج بھارت دا اندرونی معاملہ اے، اسیں کسے ملک دے اندرونی معاملیاں تے تبصرہ نہیں کردے۔