بارشاں نال تباہی، 5 جاں بحق، لاہور وچ بیڑیاں چل گئیاں
گھراں وچ پانی داخل، گھنٹیاں بجلی بند، راوی وچ درمیانے درجے دا سیلاب
لاہور، اسلام آباد (اپنے کامرس رپورٹر توں، سٹاف رپورٹر توں، کرائم رپورٹر) ملک دے کئی شہراں وچ طوفانی بارشاں نال تباہی، نیویں علاقے پانی وچ ڈُب گئے، لاہور وچ 263 ملی میٹر بارش ریکارڈ، نظامِ زندگی مفلوج، پانی دا نکاس نہ ہوؤن تے ڈیفنس وچ شہریاں نے بیڑیاں چلا دتیاں، قصور روڈ تے ٹریفک حادثے وچ موٹرسائیکل حادثے پاروں 2 بھرا جاں بحق ہو گئے، دوجے شہراں وچ بھی حادثیاں وچ 3 افراد دم توڑ گئے تے متعدد زخمی ہو گئے۔ تفصیلات دے مطابق لاہور وچ جمعرات دی سویر شدید بارش شروع ہوئی جو کئی گھنٹے جاری رہی جس نال اربن فلڈنگ دی صورتحال پیدا ہو گئی، لاہور کینٹ، ڈیفنس، والٹن، کیولری گراؤنڈ سمیت متعدد رہائشی علاقیاں تے اہم سڑکاں تے کئی کئی فٹ پانی جمع ہو گیا، نیویں علاقیاں وچ پانی گھراں تے مارکیٹاں وچ داخل ہو گیا جبکہ لیسکو دے 99 فیڈرز ٹرپ کر گئے جس نال بجلی گھنٹیاں معطل رہی، بارش پاروں سڑکاں تے انڈر پاسز پانی ہیٹھ آ گئے، متعدد علاقیاں وچ گھراں وچ پانی داخل ہو گیا جبکہ پانی دا نکاس نہ ہوؤن تے ڈیفنس وچ شہریاں نے بیڑیاں چلانا شروع کر دتیاں، ڈیفنس انڈر پاس بھی پانی نال بھر گیا، ہربنس پورہ انڈر پاس نوں بھی پانی جمع ہوؤن دی وجہ توں ٹریفک لئی بند کرنا پیا، تاجپورہ وچ 155 ملی میٹر بارش واٹر ٹینک برداشت نہ کر سکیا تے پانی گھراں وچ داخل ہو گیا۔
لاہور وچ سب توں زیادہ بارش ایئرپورٹ تے 263 ملی میٹر ریکارڈ کیتی گئی جبکہ مناواں وچ 200، کاہنہ وچ 142، شادی پورہ وچ 129، مغل پورہ وچ 127 تے اپر مال تے 111 ملی میٹر بارش ریکارڈ کیتی گئی۔ بارش پاروں لیسکو دے متعدد فیڈرز ٹرپ کر گئے جس نال گھنٹیاں بجلی معطل رہی۔ دریں اثناء بارش دے دوران لاہور وچ کاہنہ دے علاقے وچ نجی ہاؤسنگ سوسائٹی دے گیٹ نمبر 2 دے نیڑے موٹرسائیکل بے قابو ہو کے فٹ پاتھ نال ٹکرا گئی جس دے نتیجے وچ موٹرسائیکل سوار 2 سگے بھرا 18 سالہ حمزہ عارف تے 16 سالہ حسن عارف موقعے تے ہی دم توڑ گئے، دوویں بھرا للیانی توں قصور جا رہے سن۔ جبکہ نشتر کالونی دے علاقے بنکرز سوسائٹی وچ بارش پاروں چھت ڈگن نال ملبے ہیٹھ دب کے 55 سالہ علی شیر، 15 سالہ علی حسن، خاتون صائمہ تے آمنہ بی بی شدید زخمی ہو گئے۔ ادھر فیصل آباد وچ بارش دے دوران نواحی علاقے کھڑیانوالا جھمرہ روڈ تے رحمن کالونی وچ خستہ حال مکان دی چھت ڈگ گئی تے ملبے ہیٹھ دب کے 30 سالہ مدثر جاں بحق ہو گیا۔ علاوہ ازیں تحصیل جھمرہ وچ چک نمبر 160 ر ب وچ حویلی دی کچی چھت ڈگن نال 47 سالہ نازیہ بی بی تے اس دی 7 سالہ دھی مریم زخمی ہو گئی۔
نارروال دے نواحی پنڈ سیر باجوہ وچ حویلی دی خستہ حال چھت ڈگ گئی جس نال دو زنانیاں زاہدہ بی بی تے منظوراں بی بی زخمی ہو گئیاں، ملبے ہیٹھ دب کے 5 مجھاں ہلاک ہو گئیاں، 20 نوں جیوندا نکال لیا گیا۔ سیالکوٹ وچ گوہد پور چوک وچ چھت ڈگن نال 32 سالہ مزدور ارشد جاں بحق جبکہ اس دا ساتھی 30 سالہ اکبر علی زخمی ہو گیا، علاوہ ازیں ڈسکہ روڈ نال ملحقہ ددوالی پنڈ وچ بارش پاروں مکان دی چھت ڈگن نال 3 بال زخمی ہو گئے۔ قصور دے نواحی علاقے ملت پارک رائے ونڈ روڈ تے بارش توں بعد چھت تے جمع پانی نوں نکالتے ہوئے 13 سالہ کڑی مریم دختر عمر دراز نوں کرنٹ لگ گیا جس پاروں وہ موقعے تے ہی جاں بحق ہو گئی۔ ننکانہ صاحب وچ سیدوالا روڈ تے برآمدے دی چھت ڈگن نال 60 سالہ مراد علی تے 22 سالہ وقاص زخمی ہو گئے۔ علاوہ ازیں قصور، گوجرانوالہ، وزیر آباد، حافظ آباد تے دوجے شہراں وچ بھی بارش پاروں نیویں علاقیاں وچ پانی جمع ہو گیا۔ ادھر سندھ وچ بھی طوفانی ہواواں تے گرج چمک نال جھڑی بارش دا سلسلہ جاری اے، کئی ضلعیاں وچ سڑکاں پانی ہیٹھ آ گئیاں تے بجلی معطل ہو گئی۔
دوجی پاسے مون سون بارشاں پاروں پنجاب دے دریاواں وچ پانی دے بہاؤ وچ اضافہ ہو رہا اے۔ ترجمان پروونشل ڈیزاسٹر مینجمنٹ اتھارٹی (پی ڈی ایم اے) پنجاب دے مطابق تربیلا وچ پانی دا بہاؤ 3 لکھ 36 ہزار، چشمہ وچ 3 لکھ 2 ہزار کیوسک اے، دریائے چناب وچ خانکی تے قادر آباد دے مقام تے اچھے درجے دا سیلاب اے۔ مرالہ دے مقام تے پانی دا بہاؤ 1 لکھ 95 ہزار، خانکی دے مقام تے 2 لکھ 62 ہزار تے قادر آباد دے مقام تے پانی دا بہاؤ 2 لکھ 45 ہزار کیوسک اے، دریائے ستلج تے جہلم وچ پانی دا بہاؤ نارمل اے جبکہ دریائے راوی وچ بلوکی دے مقام تے پانی دا بہاؤ 73 ہزار کیوسک اے تے گھٹ درجے دا سیلاب اے، دریائے جہلم وچ منگلا دے اُتلے علاقیاں وچ درمیانے درجے دے سیلاب دا امکان اے۔
علاوہ ازیں سیالکوٹ وچ نندپور تے گڑربریار دے مقام دے نیڑے نالہ ڈیک دا بند ٹوٹ گیا جس نال ہزاراں ایکڑ تے زرعی زمین پانی ہیٹھ آ گئی، درجناں پنڈاں وچ پانی داخل ہو گیا، نندپور تے میرک پور دا زمینی راستہ کٹ گیا۔ علی پور چٹھہ وچ دریائے چناب وچ پانی دی سطح تیزی نال بلندی تے ہوؤن تے بیلہ دے متعدد پنڈ پانی ہیٹھ آ گئے ہن۔ نیشنل ڈیزاسٹر مینجمنٹ اتھارٹی نے شدید مون سون بارشاں نوں دیکھدے ہوئے ندی نالیاں وچ طغیانی تے سیلابی صورتحال دا الرٹ جاری کردے ہوئے کہیا کہ گلگت بلتستان، خیبرپختونخوا، آزاد جموں و کشمیر، بلوچستان تے پنجاب دے مختلف علاقیاں وچ سیلابی صورتحال پیدا ہوؤن دا خدشہ اے، دریاواں تے ندی نالیاں وچ طغیانی دا امکان اے۔ علاوہ ازیں پنجاب تے خیبرپختونخوا وچ مون سون بارشاں تے سیلاب نال نقصاناں بارے جاری کیتی گئی رپورٹاں دے مطابق حادثیاں وچ ہن تک مجموعی طور تے 43 افراد جاں بحق جبکہ کئی گھر ڈگ چکے ہن۔
