پراسیکیوٹر جنرل دی تعینیاتی اسلام آباد بار توں ہووے گی : اعظم نذیر تارڑ

وفاقی دارالحکومت دے حوالے نال دیوے تھلے انہیرا نہیں ہون دتا جاوے گا، وزارتِ قانون نے اپنی جگہ وکلاء چیمبراں لئی دین دا فیصلہ کیتا اے :تقریب نال خطاب

اسلام آباد(اپنے نامہ نگار توں، دنیا نیوز) وفاقی وزیرِ قانون اعظم نذیر تارڑ نے کہیا اے کہ جے ذمہ داریاں ایمانداری نال نبھائیاں جاون تاں دنیا چنگے کماں نوں ہمیشاں یاد رکھدی اے، پراسیکیوٹر جنرل اسلام آباد دی تعینیاتی اسلام آباد بار توں کیتی جاوے گی۔ جوڈیشل کمپلیکس وچ تقریب نال خطاب کردیاں اعظم نذیر تارڑ نے کہیا کہ وزارت سنبھالدیاں ہی اوہناں نے قول کیتا سی کہ اسلام آباد نوں پہلی ترجیح دتی جاوے گی تے وفاقی دارالحکومت دے حوالے نال دیوے تھلے انہیرا نہیں ہون دتا جاوے گا۔

اعظم نذیر تارڑ نے کہیا کہ 2022 وچ حکومت سنبھالن توں بعد نگراں حکومت دا ویلا وی آیا، پر ترقیاتی منصوبے نہیں روکے، اسلام آباد وچ جنے ترقیاتی منصوبے مکمل ہوئے، اِنے ہور کیتے نہیں ہوئے، وفاقی دارالحکومت نوں اک مثالی ماڈل شہر دے طور تے سامنے آؤنا چاہیدا اے۔ وفاقی وزیرِ قانون نے کہیا کہ اسلام آباد وچ ڈسٹرکٹ جوڈیشل کمپلیکس دا منصوبہ مکمل کیتا گیا، بھاویں ایس وچ کچھ مسئلے سن جنہاں نوں حل کیتا جا رہیا اے۔ اوہناں نے دَسیا کہ ڈسٹرکٹ کورٹس دے نال وکلاء دے چیمبراں لئی جگہ خاص کیتی گئی اے جد کہ وزارتِ قانون نے وی اپنی جگہ وکلاء چیمبراں لئی دین دا فیصلہ کیتا اے۔ ایس موقعے تے جج صاحبان توں علاوہ بار کونسل دے ممبر راجہ علیم عباسی، ڈسٹرکٹ بار دے صدر نعیم گجر، ہائیکورٹ بار دے پہلے سیکرٹری جنرل شفقت عباس تارڑ تے دوجے عہدیدار وی موجود سن۔