باہرلے ملک محفوظ روزگار، قومی امیگریشن تے ویلفیئر پالیسی دا باقاعدہ اغاز
مقصد ہنر مند افراد دی تیاری تے اوورسیز پاکستانیاں نوں اثر دار تحفظ دینا اے، پالیسی وچ 5 بنیادی حکمتِ عملی دے تھمھاں تحت اصلاحواں لاگو کیتیاں گئیاں نے: چودھری سالک
اسلام آباد (اپنے رپورٹر توں) وفاقی وزیر اوورسیز پاکستانیز چودھری سالک حسین نے اسلام آباد وچ قومی امیگریشن تے ویلفیئر پالیسی 2026 دا باقاعدہ اغاز کردیاں کہیا کہ حکومت دا مقصد باہرلے ملک محفوظ تے قانونی روزگار دے موقعے ودھاؤنا، ہنر مند بندیاں نوں عالمی معیار دے مطابق تیار کرنا تے اوورسیز پاکستانیاں نوں اثر دار تحفظ دینا اے۔ اوہناں نے کہیا کہ ایک کروڑ 10 لکھ توں ودھ اوورسیز پاکستانی دیس دی معیشت وچ کنڈھ دی ہڈی ورگی حیثیت رکھدے نے تے مالی سال 2025-26 دے دوران 41.58 ارب ڈالر دیاں ریکارڈ ترسیلاتِ زر (پیسے) بھیجے نے۔ پالیسی تحت پنج بنیادی حکمتِ عملی دے تھمھ سامنے لیاندے گئے نے، جنہاں وچ محفوظ امیگریشن، ہنر دی ترقی، لیبر مارکیٹ ریسرچ سیل، اوورسیز ایمپلائمنٹ پروموٹرز دے نظام دی اصلاح، ڈیجیٹل امیگریشن سسٹم تے یورپی یونین نال ٹیلنٹ پارٹنرشپس شامل نے۔
اوہناں نے دَسیا کہ نیوٹیک دے تعاون نال سکھلائی دے نصاب نوں عالمی معیار نال ملایا جاوے گا، جد کہ زنانیوں، معذور لوکاں تے گھٹ نمائندگی والے علاقیاں نوں وی خاص موقعے دتے جاون گے۔ کامیاں دیاں شٹکایتاں دور کرن لئی انٹرنیشنل کال سینٹر، خاص عدالتاں، ای او بی آئی پنشن، تعلیمی واؤچرز تے وطن واپسی تے بحالی دا نظام وی شروع کیتا جاوے گا۔ پالیسی تے عملدرآمد ایک، دو تے تن سالہ مرحلیاں وچ ہووے گا، جد کہ وفاقی وزیر دی اگواہی وچ اعلیٰ سطحی ٹاسک فورس ایس دی نگرانی کرے گی۔
