فلم بلھیا دا ناں تبدیل، قابلِ اعتراض ڈائیلاگ کڈھن دی سفارش
ہاؤسنگ سکیمان وچ صحافی کوٹہ ودھاؤنا، لون تے ہاؤسنگ فنانس وچ ترجیح دین دی تجویز: سینیٹ کمیٹی اطلاعات دا سفارشاں تے عملدرآمد دی نگرانی لئی ذیلی کمیٹی بناؤن دا فیصلہ
اسلام آباد (نامہ نگار) سینیٹ دی قائمہ کمیٹی برائے اطلاعات و نشریات نے اگویاں (مستقبل دیاں) ساریاں وفاقی ہاؤسنگ سکیمان وچ صحافیاں تے میڈیا ورکرز لئی خاص کیتے گئے پلاٹاں تے فلیٹاں دے کوٹے وچ وادھے دی سفارش کردیاں صحافیاں لئی خاص ہاؤسنگ لون سکیم یا سرکاری ہاؤسنگ فنانس سہولتاں وچ ترجیح دین دی تجویز وی پیش کر دتی۔ کمیٹی نے فلم “بلھیا” وچ حضرت بابا بلھے شاہؒ دے پیغام دی غلط تشریح تے وی سخت فکر مندی دا اظہار کردیاں پروڈیوسرز نوں فلم دا ناں تبدیل کرن تے قابلِ اعتراض ڈائیلاگ کڈھن دی سفارش کیتی، جد کہ سنسر بورڈ وچ صاف ستھری تے میرٹ تے مبنی تقرریاں تے وی زور دتا۔ کمیٹی دا اجلاس قائم مقام چیئرمین سینیٹر سرمد علی دی صدارت تھلے پی ٹی وی ہیڈکوارٹرز وچ ہویا۔
اجلاس وچ وفاقی سرکاری ملازمین ہاؤسنگ اتھارٹی نے دَسیا کہ میڈیا ورکرز دے کوٹے تحت الاٹمنٹ مکمل ہو چکی اے، پر صحافیاں دے کوٹے نال متعلق معاملے ہلے التوا وچ نے۔ ایس تے کمیٹی نے غصے دا اظہار کردیاں سفارشاں تے عملدرآمد دی نگرانی لئی ذیلی کمیٹی قائم کرن دا فیصلہ کیتا۔ وزارتِ اطلاعات نوں ہدایت کیتی گئی کہ صحافیاں دے نمائندیاں تے مشتمل کمیٹی دا اک ہفتے وچ نوٹیفکیشن جاری کیتا جاوے تے اک مہینے وچ موجودہ پالیسی دا جائزہ لے کے عمل جوگ تجاویز پیش کیتیاں جاون۔ پی آئی ڈی نوں علاقائی اخباراں لئی خاص 25 فیصد سرکاری اشتہاری کوٹے تے سختی نال عملدرآمد یقینی بناؤن دی وی ہدایت دتی گئی۔ اجلاس وچ این سی سی آئی اے ولوں سوشل میڈیا نال متعلق بریفنگ وی دتی گئی، کمیٹی نے این سی سی آئی اے نوں کسی وی اخبار، اوہدے ڈیجیٹل ایڈیشن، ویب سائٹ یا ٹی وی چینل دی چھپی خبر تے کارروائی توں روک دتا۔
