لاڑکانہ دے نواباں نوں پنجاب دی ترقی ہضم نہیں ہو رہی : عظمیٰ
وزیراعلیٰ نے وسائل نوں اٹک توں رحیم یار خان تے راولپنڈی توں وہاڑی تک پہنچایا، پنجاب وچ جے پیپلز پارٹی چوتھے نمبر دی جماعت اے تاں ساڈا کیہ قصور : وزیرِ اطلاعات
لاہور (سٹاف رپورٹر) وزیرِ اطلاعات و ثقافت پنجاب عظمیٰ بخاری نے پیپلز پارٹی دے ترجماناں دے بیاناں تے ردِعمل دیندیاں کہیا اے کہ لاڑکانہ دے نواباں نوں پنجاب دی ترقی ہضم نہیں ہو رہی، سچائی ایہ اے کہ پنجاب دے لوک مسلم لیگ (ن) دی کارکردگی تے اپنے بھروسے دا اظہار کر رہے نے، پنجاب وچ لوکاں دا پیسہ لوکاں دی بھلائی (فلاح و بہبود) تے ترقیاتی منصوبیاں تے خرچ ہو رہیا اے تے ایہی گل پیپلز پارٹی نوں بری لگ رہی اے۔ اپنے بیان وچ عظمیٰ بخاری نے ہور کہیا کہ وزیراعلیٰ پنجاب مریم نواز دی حکومت نوں صرف دو سال ہوئے نے پر ایس تھوڑے ویلے وچ وسائل دی برابری نال ونڈ نوں یقینی بناؤندیاں ترقی دا دائرہ اٹک توں رحیم یار خان تے راولپنڈی توں وہاڑی تک پھیلا دتا گیا، جے پیپلز پارٹی پنجاب وچ چوتھے نمبر دی جماعت اے تاں ایس دی ذمہ دار مسلم لیگ (ن) نہیں سگوں اوہناں دی اپنی سیاسی کارکردگی اے۔
وزیرِ اطلاعات نے کہیا کہ جڈوں مرتضیٰ وہاب لاہور وچ سکھن آئے تاں پنجاب حکومت نے ہر ممکن تعاون کیتا، ساڈی خواہش اے سندھ دے لوک وی بہتر طرزِ حکمرانی تے ترقی دے پھلاں توں فائدہ چک سکن۔ اوہناں نے بلاول بھٹو زرداری نوں مخاطب کردیاں کہیا کہ اوہ اک بڑی سیاسی جماعت دے چیئرمین نے، اوہناں نوں نفرت تے ونڈ دی سیاست توں پاسہ کرنا چاہیدا اے، سندھ وچ ترجماناں دی پوری فوج صرف پنجاب تے تنقید کرن لئی متحرک اے
